雖然近排車市唔好，但仍能一枝獨秀賣過滿堂紅，都可算係寶馬代理；皆因早輪佢哋以特惠價出售部520iA，賣過150部之後，近排佢哋又預售批用嚟響今個月底，在港舉行嘅國際性經濟會議上，接載批貴客嘅735iCEO特別版亦悉數售罄，你都咪話唔厲害。最近亞Mark又收到風，話今個星期五嘅寶馬Z4亞洲首展上，代理又會以超值價推售316tiCompact；聽聞手波版不過賣21萬，而自動波版就賣22萬6千5，因應番早輪3系嘅十個巴仙車價下調。據知批車只得30部，賣晒就無㗎喇！
至於今個周五車展主角嘅寶馬Z4Roadster，亞Mark終於查到個車價，部2.5公升版定價為39萬6千，而頂級3.0型號就賣49萬6千；而車迷除咗可以去車展會場，近距離接觸到部車外，嚟緊周五我哋《車天車地》版重有呢部左軚Z4嘅介紹㖭！係寶馬忠實Fans嘅你，就記住唔好錯過喇！