近期市況欠佳，發展商為求賣到樓，只有減價一途，而且減幅愈嚟愈勁。威新集團嘅西營盤正街雅賢軒，宣布今日推出震撼優惠促銷十個精選單位。但撞啱財爺話有新措施推高樓價，威新唔知會唔會轉軚不減反加呢。
睇番呢個盤，係單幢樓，共有四十六伙，兩房單位面積604呎，三房單位833呎，而頂層複式就有1705方呎，每伙都附環保露台。該盤在4月初推出四伙，到6月已經賣咗十七個單位。
不過，發展商喺6月再推出五個單位時，既送7%現金回贈，又送律師費同釐印費，變相減價12%，折實每方呎3024蚊。而今日嘅優惠究竟有幾震撼呢？勁唔勁得過新界樓呢？
不過噚日財政司司長梁錦松現身，大講政府會有措施推高樓價，市場形勢似乎又唔同咗，發展商嘅賣樓策略睇嚟又要再作調整，唔係賣平咗就唔抵啦。雅賢軒喺呢個時候話減價，重強調係震撼式，似乎唔多合時兼唔知點收科。
九龍塘衡州道22號獨立洋房上個禮拜截標。負責招標嘅利嘉閣測量師行聯席董事王國權話，共收到三份標書。有買家願意出價四千五百萬，但係業主堅持要五千萬，拒絕接納買家嘅出價，重話11月又再招標。截標後唔賣，係好平常嘅事，但在短時間內再標售，就唔係咁多。
住開跑馬地嘅黎明，前日黃昏去九龍塘陶源睇樓。聽講黎明一去到就即刻上頂樓，參觀兩個最貴重嘅複式單位，而且對其中一個好有興趣，睇完之後重同發展商傾細節㖭。發展商成日話個單位每呎賣1萬蚊，唔知黎明買有冇折扣呢？
坊間指黎明早有意買個複式，所以發展商企硬，有買家8000蚊呎洽購都唔制，原來準買家大有來頭，唔叫貴啲點顯示到佢嘅身份同地位。諗諗吓前日蘭西都有去陶源開記者會，逗留到5點幾先走，黎明就等啲記者散晒先到，認真醒目。
陶源發展商永泰亞洲近嚟積極催谷個盤，假如黎明單交易可以搞掂，其餘單位睇嚟都可以好快就賣得晒。明星效應幾時都掂，睇吓跑馬地禮頓山同紅磡海名軒就知啦！
中山市著名樓盤之一雅居樂花園，以震撼價發售中山凱茵新城首批現貨。洋房每呎由202蚊起，別墅349蚊起，最貴嘅獨立屋，就要456蚊起。為加強吸引力，首十八名買家有九折，業主介紹新買家，獲贈一年管理費。震撼價係樓盤促銷嘅必殺技，香港內地一樣有效。
東莞樟木頭帝豪花園，喺本月25號到10月20號，憑報章廣告印花買樓有着數。最矚目係當地鎮政府竟然送現金畀買家，每位8000蚊。
發展商搵到鎮政府送錢，認真夠本事。假如香港政府都嚟呢招買樓送錢，話唔定可以救到樓市。
新昌地產管理公司最近攞咗房委會今年第一批商場管理合約，兩份合約共3個商場。
新昌地產管理董事總經理樊卓雄話，今個月1號已經接手管理沙田隆亨邨同薄扶林華富邨二期商場。12月會管埋筲箕灣耀東邨商場。
蘭西
電郵地址：