呢一輪，日日瞓醒，美股都唔見一百幾十點，港股雖然超賣，但受美股拖累，一路咁跌，噚日連跌6日，恒指卒之落到9000水平先反彈，中段時個勢真係好曳，但尾市反彈之勢亦幾急，特別係期指，噚日大部份時間都有輕微高水，臨尾嗰十幾分鐘，掃得重急，若外圍止跌，港股亦會反彈。
恒指噚日低見9014，險守9000關，收市9124，跌72點，期指高水31點，大市成交亦增至66億元。藍籌股經連日下跌後，已吸引到較多買盤趁低吸納，單係滙豐（005）成交已16.2億元，其他如長實（001）、和黃（013）、恒生（011）、新地（016）和中移動（941）等，亦有2.5億至3.7億元不等，呢6隻大藍籌，幾已佔咗大市成交一半。大跌之後成交增加，通常會係跌市尾聲之兆，但即使止跌回升，暫時仍只能以反彈視之。
強勢股最後一跌，滙豐和恒生呢兩隻大強勢股，俱下跌1.5元，但裂口下跌而能以最高價收，則短期仍不能看得太淡。早輪大跌的地產股則反彈，新地最強勢，以最高價45元收市，大升1.3元，好多藍籌和恒指Call輪都有逆市表現，唔少人博反彈。
比亞迪（1211）噚日出現「股災」式的調整，一度跌穿14元，報13.95元，收市上番15元，但仍大跌1.9元，消息指比亞迪被日本三洋電機美國附屬入稟控告侵犯專利權，引致獲利沽盤湧現，但唔排除基金藉此而震倉。噚日跌到14元水平時，係低吸的第一個機會，因為上一個升浪由13.5元起步，升到18.7元，而落番14元，明顯係跌過籠。不過，公司就話投訴並非第一次，之前在取得摩托羅拉合約時亦試過一次，公司將會盡快澄清。比亞迪近期仍會大幅波動，低吸仍有機會。
佑威國際（627）升勢持續，另一隻可留意者係路訊通（888），噚日收1.21元，近期股價表現已逐漸轉強，此股由5月初高位2.7元回落，跌到1.12元才反彈，10日線在1.22元，今日有機會衝破，初步目標係1.4元，中線可見1.7元。路訊通在4個月內公布3項內地投資，預期明年開始，有1成的收入將會來自內地媒體業務，未來會繼續上升。
郭兆誠