香港成日話同上海競爭，家陣戰場已經擴大到珠江三角洲鬥長江三角洲；估唔到噚日重激，搞到機場管理局主席馮國經與瑞安老闆羅康瑞在全球CEO面前舌戰。
話說福布斯在香港搞CEO論壇，馮國經同羅康瑞同台演講；馮國經家陣好似已經改名「馮珠江」，句句都提到珠三角點好點正，猛叫班CEO多多留意。
羅康瑞有名係「上海姑爺」，見到馮珠江咁hardsell，即刻插口話珠三角發展咗咁耐，已經無乜肉食，應該放眼長江流域，包括上海同埋中西部嘅重慶、武漢，重話上海係做生意嘅好地方。
上海姑爺喺上海搞咗個「新天地」，賺到盤滿缽滿，聽講最近重搵咗投資銀行幫新天地賣股，套現袋袋平安，有乜辦法唔趁呢個大好機會幫上海賣廣告？
不過八方唔會怪羅康瑞倒香港米，因為佢噚日都話香港仍有競爭優勢；而舊年十月，上海交易所總經理助理方星海在「世界經濟論壇」上大言不慚，話上海有力取代香港作為國際金融中心，羅康瑞在場即時反擊，話上海有排都未追得上香港，所以呢個姑爺都唔算忘本。
傳真︰2623-9278
電郵︰