隨住經濟轉弱，玩具玩家漸漸分成兩大派，有錢嘅繼續鍾情各式各樣的特別版，限量版玩具動輒二、三千元都毫不手軟；而一般人則主攻扭蛋、模型等幾百蚊嘅玩具。想買新貨又要平的話，呢個玩具開倉就咪錯過，由最新嘅超人吉田大Figure、MG版SHINNINGGUNDAM，以至美國嘅漫畫英雄陶瓷都應有盡有，絕對抵玩！
記者：張穎倫
攝影：林栢鈞
有幪面超人嘅地方，當然會有鹹蛋超人嘅出現。今次接招更係老大哥超人吉田大Figure，佢唔單止擁有15吋身高夠晒氣勢，而且更係最新獨家貨。香港其他地方都未開始賣，呢度就以開倉價發售，日本賣到近$350，𠵱家$128的確平到笑。
貨量：30
街價：$350
開倉價：$128
雖然佢冇龍騎咁新鮮熱辣，但憑住近排電視同巴士都有佢嘅出現，幪面超人古迦無論大人同細路仔都一樣咁鍾意。呢款Bandai推出嘅12吋超裝可動系列Figure，更賣到四百幾蚊都大把人捧場，皆因佢夠紅之餘，PEGASUSFORM造型只要3粒水銀電就識兩眼發光，像真度極高，再加上附設三對不同造型嘅拳頭，要擺邊個Pose都咁型仔。
貨量：10
街價：$450
開倉價：$250
若然你未集齊第三、四輯BE@RBRICK積木的話，就要把握呢個最平嘅機會，事關呢度每隻BE@RBRICK只賣$10一隻，更係有盒有卡，絕對唔係翻版貨。而且就小記所見，款式都算幾齊，最啱要補購，又或者想平平哋玩BE@RBRICK嘅朋友。
貨量：40
街價：$25
開倉價：$10
玩開模型都知MG版嘅模型一直都好難跌破$100呢個界線，但呢隻1:100嘅閃光高達竟然只賣$68，不但係最平嘅MG模型，更隨時比次一級嘅HG版平，絕對誇張。質素方面就一啲都無馬虎，除咗關節活動能力高之外，更有埋多蒙公仔同綠色手掌附送，畀你隨時使出厲害嘅「爆熱掌」。
貨量：10
街價：$124
開倉價：$68
呢批扭蛋雖然出咗已經一段日子，但價錢就企得好硬，皆因日版收藏價值始終比港版高。一套5隻有齊主角嘅野狗、兇狗、Q64、06-WP、14-WPC五部機體，上色方面極之精細，但開倉價只賣$25，比廟街翻版貨重要平。
貨量：30
街價：$84
開倉價：$25
唔少人買猿人KUBRICK都係半途出家，買到Part4先想搵番之前嘅太空船，又或者睇完套戲先想買齊全套，導致市面上想搵齊Part1-Part4全套都好難。今次開倉有5套發售，而且只賣$299，想一次過有齊所有人物、武器同飛船的話就咪執輸啦！
貨量：5
街價：$550
開倉價：$299
日本嗰邊主打Figure，美國就以傳統嘅漫畫陶瓷最煞食，雖然冇活動能力，只可做擺設，但就勝在雕功非常精細，睇睇羅賓大髀嘅肌肉，簡直同漫畫一樣。全場有神奇女俠、蝙蝠俠、羅賓同超人等各款超級英雄任揀，全部都係華納出品，放喺屋企最有台型。
貨量：10
街價：$800
開倉價：每款$498
講嘅唔係9位妹妹仔，而係呢個陶瓷超人曲奇樽，高度達到10吋，超人掙脫鎖鏈嘅形態有氣勢之餘，亦可以儲存大量曲奇餅。由於係DCCollector'sEdition嘅關係，喺香港極之稀有，唔少漫畫Fans去到美國想買又覺得太大件，今次以開倉價發售不容錯過，同場亦有Batman同貓女任擇。
貨量：10
街價：$650
開倉價：$398
既然有超人同Batman等DC旗下嘅漫畫英雄，當然唔少得MARVEL嗰份啦。不過MARVEL嘅5吋細陶瓷，除咗GHOSTRIDER之外，大部份都係力谷奸角，好似蜘蛛俠嘅死對頭綠魔，以及X-MEN入面嘅Juggernaut。勝在個個都造型詭異，再加上每個都有獨立編號，全球限量6000個左右，收藏價值更高。
貨量：10
街價：$280
開倉價：每款$178
開倉資料：玩具超市開倉
地址：荃灣德士古道62-70號寶業大廈A座8樓3室（悅來酒店側）
電話：24091831
開倉日期：即日起至10月5日
營業時間：逢星期三至星期六11:30am-7:00pm
＊相同貨品每人限買一件，只收現金。