早兩日同某導演講開劉德華，馮仁昭話華仔一向天不怕地不怕，不過導演話華仔都有死穴，就係好怕老鼠。
原來華仔怕老鼠係有段古，話說佢細個住喺鑽石山嗰陣，曾經着住一條闊腳褲經過坑渠，忽然有一隻大老鼠捐入去褲管，嚇到佢雞飛狗走。
不過，最驚嚇嘅一次係佢見到一隻好大嘅坑渠老鼠竟然咬住隻貓，呢幕情景令佢覺得好恐怖，從此佢就好驚老鼠。
喺無綫五虎年代，有一次苗僑偉（阿苗）同埋啲工作人員諗住整蠱華仔，所以喺開工時，專登將隻老鼠擺喺佢面前，當時華仔好似失咗控咁向前打咗一拳，好似打中咗企喺佢前面嘅阿苗！
聽聞華仔呢拳都好重，幾乎將阿苗打暈，所以華仔成日都提醒啲人，千祈唔好攞啲老鼠嚟同佢玩，否則鐵拳無情。
姚樂怡、湯寶如、李麗珍、陳敏之同陳錦鴻噚日喺旺角拍新戲《花園街1號》，場戲講陳錦鴻俾陳敏之摑咗一巴，雖然已經就住嚟打，但陳錦鴻都俾陳敏之摑到面都紅晒。
姚樂怡同湯寶如以前都愛過同一個男人，佢就係梁漢文嘞！唔知係咪因為大家都同呢個男人分咗手，所以見佢兩個冇乜嘢，重肯一齊影相。不過，湯寶如等埋位嗰陣就唔多埋堆，問番佢同姚樂怡合作有冇尷尬？湯寶如話：「我真係唔知佢之後同邊個拍拖，其實我同梁炳（梁漢文）分手，唔係有第三者，我同佢都冇再聯絡。」姚樂怡就話：「冇尷尬，我哋真係冇嘢。」
阿Lam林子祥下個月會喺紅館開四場演唱會，佢噚日做商台訪問時，同記者講開老婆葉蒨文（沙麗）話咁多年都未有所出，佢話沙麗未必冇得生，好多人都四、五十歲先生仔，但佢唔會畀壓力佢。至於沙麗爆當年自己嘅票數低過王菲，但都攞咗金曲獎呢件事，阿Lam話沙麗冇同自己提過，問佢覺唔覺老婆份人直腸直肚好蝕底，阿Lam就話：「我唔講嘢，人哋夠一樣話我蝕底！」
巨星真係死性不改，之前發生咗咁大鑊嘅事，重未識驚，咁辛苦先保住同老婆嘅婚姻，點知一返到香港又即刻搵女，唔知幾時又會撞大板。不過佢呢輪睇中咗某唱片公司嘅妹妹仔，聽聞佢搭上妹妹仔之前，個妹妹仔早已俾佢一個老友快活過啦！不過巨星生性孤寒，做佢女朋友亦唔會有乜大着數，頂多可以增加吓知名度啦！
張鎧潼（Samantha）噚日以代言人身份出席「麗確理光RR30」嘅發布會，Samantha身為代言人竟然遲到四十五分鐘，搞到成班麗確高層都唔理佢，要準時開始發布會，其中一個高層重同記者講話可能佢重未瞓醒。之後，Samantha嚟到就即刻話自己因為肚屙先遲到，重屙得好嚴重嗰隻，但係唔知點解佢嚟到之後就完全冇事呢？
黃凱芹下個月十號開演唱會，噚日喺報紙登廣告，不過鳴謝嘅嘉賓之中有唔同公司嘅蕭正楠份。早前黃凱芹所屬嘅環球唱片公司曾經公開話唔准旗下歌手同蕭正楠合照，問黃凱芹會唔會驚公司唔鍾意？佢話蕭正楠係主辦單位請，重話蕭正楠係識唱歌嘅人，唔反對佢做嘉賓，公司高層陳少寶亦從來冇鬧過佢。另外黃凱芹話想請朱茵做嘉賓，但唔知對方得唔得閒。