港股噚日連續第6日下跌，但交投增加同埋波幅擴大，總算冇咁悶。美股周二晚下跌189點，收7683。美國聯儲局一如所料，維持息率唔變，睇番佢哋嘅講稿，似乎對經濟再冇咁樂觀，下個月開會減息嘅機會提升，可惜對港股冇支持作用。恒指開市已跌至9000邊緣，但地產股由低位反彈，推高港股，令跌幅收窄，最後收報9124，跌72點，成交66億銀。
新地（016）逆市勁升，早市低開43.30元，但有大孖沙追貨，博今日公布業績有利好消息，結果以全日高位45元收市，升1.30元，成交3.37億元。阿董同阿松出席福布斯論壇時出口術，話將有刺激樓市措施。資深大姐大話，呢啲口術冇特別，反而有啲芬佬覺得地產股跌過龍，滙豐（005）反而未跟大市跌足，因此決定沽滙豐買新地，炒第4季地產股升銀行股跌。
今年「新星」比亞迪（1211）俾日本三洋電機控侵犯專利權，搞到股價直插，噚日最低曾造13.95元，勁挫17.4%，但百富勤及貝爾斯登力托，股價收報15元，仍跌1.90元或11.24%。e莉莎話，比亞迪7月在香港上市，現價仍較招股價10.95元上升近4成，調整在所難免，但百富勤消息人士指持重貨嘅芬佬未出貨，三洋單料早幾年已提過，相信影響不大，股價在15元以下不妨買番啲。
新銀集團（988）於收市前突然有16手大盤上板，涉及12.8億股，每手全部都係8000萬股，最初3手貨作價每股2.6仙，其後13手每股2.7仙，銀碼總數3432萬元。出市仔話莊家批貨出街，似乎想做嘢，但市況咁差，都係「食少餐」算數。
阿 虎