凱沙羅頓件後衞藍斯早前涉嫌強姦，搞到一身蟻之後，最近佢又患上人見人怕嘅肺癆，呢次重搞到凱沙羅頓成隊波差啲中招，認真累街坊！
上季中藍斯就曾經因為牽涉入一宗強姦案，凱沙羅頓為咗整肅軍紀，結果引刀一快，即時請佢食「豉椒炒魷」，令藍斯失業。雖然凱沙羅頓後來都係再簽番佢，但最近呢位埃及籍後衞又被證實患上肺癆已經一段時間，重懷疑已經傳染咗畀隊友㖭，搞到𠵱家凱沙羅頓全體職球員都要體檢，好一個累人累物嘅人辦。
其實凱沙羅頓當日請番呢個瘟神，有啲自作孽嘞！
早前因為打傷隊友，而被李斯特城合法解約嘅前英格蘭國腳韋斯，響失業六日後就搵到米禾爾呢個新歸宿。不過咁，我求大俠同佢計數，雖然佢可以繼續踢波搵銀，但因被李隊合法解約而唔見咗嘅大約三百萬鎊薪酬，睇嚟都幾難再響有財困兼要減球員人工嘅米禾爾搵得番嘞，一日都係衝動累事啦！
「大恩」恩沙基撻行副偈場場有波入，令隊友舒夫真高遲啲養好傷後都唔知重有冇正選，亦有傳AC米蘭準備響出年一月轉會市場重開時賣走佢，我求大俠就覺得AC咁做有啲似狡兔死走狗烹嘞，有咗恩沙基同李華度就唔識人。其實舒夫真高依家幾尷尬，因大球會皇馬、曼聯等已有新目標前鋒，且舒夫真高成日傷，就算將來有班落都屬次級球會，真係時也命也！
曼聯響歐冠盃作客打敗咗利華古遜，費爵爺話對球隊嘅防線相當滿意，我求大俠就唔啱聽嘞，睇李奧費迪南無端端兜巴打落對手後腦而食個黃牌嘅唔成熟表現，再加上退步嘅加利仔已出番嚟，費Sir又要開始為條防線擔心至真。最衰利華古遜爭啲運氣，如果貝碧托夫完場前嗰吓頭槌中柱係彈入唔係彈出，睇怕費Sir實改口！
逢周一至周五見報