集化妝品牌與皮膚護理服務於一身的一站式美容店不算是新事物，但最近於尖沙嘴登場的這家，就依然有睇頭，特別之處不僅在於它沒有名字，而在約2000呎的空間內，罕有地集合了五個有名氣的護膚及化妝品牌，而裏面的Treatmentspa，更提供少見的鮮果美容服務，絕對新鮮感十足。記者第一時間搵埋模特兒「入站」親身測試，半天玩盡五項服務！
記者：羅惠芬
攝影：伍慶泉
模特兒：孫亞莉
雖然5個化妝品牌的專櫃令人眼花撩亂，但TreatmentSpa的魅力更不可擋，模特兒率先試新推出的「三重氧氣活膚療程」，我就覺得不能錯過這裏的100%NaturalTreatment，好驚喜，這個以生果為主的皮膚護理，用的竟然是新鮮生果！美容師會預先將新鮮生果磨碎，加入香薰油，不同膚質的人就有不同配方，認真夠天然體貼，近來秋風起，皮膚有點乾，於是選了個薄荷乳酪保濕護理，夠清香，而且做完之後成個人都好精神。
Check
Treatment選擇多，兼且有埋男士面部護理服務，帶埋男朋友一齊去做Facial，當拍拖節目就最好。部份項目收費頗高，好似做1小時15分鐘的「三重氧氣活膚療程」，就要收$980，好肉痛。
做完Treatment最怕成身黏𣲷𣲷，所以一聽到話可以沖涼，成個人即時醒晒。原來只要在TreatmentSpa做完護理，都可以免費沖個靚涼。可以試埋Philosophy的身體和頭髮產品，先係最吸引的地方。但結果我們都失望而回，原來沖涼設施仍未竣工。
Check
首創免費沖涼服務，模特兒都話好新鮮。但就只限女士使用，唔夠完美。
做完Facial同BodyTreatment，原來重可以去埋NailBar執執對手，這裏除了指甲美容外，手部護理都有提供，而且美容師的手勢都唔錯，做完成隻手滑一滑，感覺非常正。
Check
美容師手勢夠正宗。不過NailBar對住塊半透明玻璃，給路人望住就有點尷尬，另外，如果有埋NailArt就更加好。
一般有化妝品出售加上護膚服務的美容院，都只會代理一個品牌的產品，而這裏就集合了Fresh、Philosophy、Bloom、MakeupForEver和Tony&Tina等五個化妝及護膚品牌，十月中前更有免費化妝指導，點會唔叫人興奮，聽講新服務重陸續有來。專人指導也學不懂？不妨要求製作個人彩妝VCD，這樣就可以隨時隨地重溫每個化妝步驟，不過你就得消費一定的數額，才可以免費獲得VCD化妝課程。
Check
有專業化妝師親自指導化妝技巧，例如妝點同服飾Mix&Match，好實用。重可以整埋隻個人VCD，夠特別，但就有預設條件，而且條件每隔一段時間便會更改，大家真係要事先Check清楚。
收禮物，女人當然最開心，這裏就以時時有禮送作為冧女人的一大策略，不時會有新禮品推出，不同專櫃，各有精采。攞完Sample，索性去埋Bloom個專櫃，用埋個免費包裝服務。MissBloom的絲帶和小小心意卡最得我歡心。我們這兩個愛靚女人，在這一站可真收穫豐富，連飯也忘了吃。
Check
護膚品牌成日出新貨，有Sample試用，試過適合先買，免得浪費金錢。免費包裝服務更加啱晒想送化妝品給女朋友的男孩子，可省卻包裝費。
▲地址：尖沙嘴海港城2214號舖
▲電話：23773715
▲營業時間：11:00am至9:00pm