呢日行過九龍塘地鐵站，睇見一張大海報廣告，設計就十分麻麻，冇創意，只係貼上二十六個人像（其中三四個不露真面目，只用日式電腦肖像），人像下列出學位quali，例如BSC、M.Ed.之類。左丁山最鍾意研習人物背景，於是企喺度睇真啲。
呢個係補習社廣告，企圖以補習老師嘅quali嚟吸引學生，啲老師有乜咁巴閉呢，二十六個之中，十五個寫明係HKU（港大）理學士文學士、碩士，三個中大，八個其他學校或專業人士。即係話，HKU嘅資格對中學生仍有一種魅力，補習社要搵佢哋坐鎮，以廣招徠。睇嚟，若果冇得撈而要去替人補習，或者教書冇癮，靠補習賺好多錢，港大畢業係一個好資格。
離開九龍塘站，上車去到陽明山莊，入到停車場，牆上有大字告示：你須領取車票，才被批准泊車。嘩，呢啲係乜嘢中文呀？意思唔多明白喎？睇吓英文點講，原來係：Takeyourticketwithyou.Youneeditforvalidation。唉，中英文嘅差距咁遠，陽明山莊停車場呢個告示嘅繙譯員，不如先去嗰間補習社搵老師補習吓中文先。香港商界成日彈學生啲英文水準下降，其實香港中文水平下降得重犀利，不過冇人理啫。照理陽明山莊嘅發展商（僑福）來自台灣，應該對中文重視啲啩！