滙豐（005）再散1.50元，不過其他藍籌則幾生性吓，最威係新地（016），高收45元，升3個巴仙。莫非阿松話要輕輕頂住個樓市，令人有啲憧憬？又或者今日新地派全年成績表，有春江鴨先行落水？
如果認為新地昨日個勢，重會持續多一陣，揀新地Call輪博短線，比較實際嘅對象係9539，明年5月到期，現價39仙，溢價17.1%，槓桿率11.5倍。新地其他Call輪冇錯槓桿率非常勁，不過溢價幾十個巴仙，回報高好多，但殺傷力亦係大好多。又假如新地個升勢只係挾淡倉盤造成，一兩吓玩完，則搵啲Put輪做世界亦無不可，對象係9531，隻輪明年3月到期，現價60仙，溢價11.1%，槓桿率7.5倍。
呢個兩手準備，買Call或買Put，切要注碼細細，手腳快快，一兩日間贏輸講緊兩三成。
如果諗住地產股由新地帶領，又不妨昅吓隻恒地（012）。恒地昨日原地踏步企喺22.15元，博佢跟番新地，搵恒地Call輪玩吓短線，冇得點揀，得隻仙輪9473。9473呢兩日交投好旺，昨日有50球，明年3月到期，現價8仙，溢價25%，槓桿率27.7倍。
恒地另外3隻Call輪，已去到1仙地步，完全唔使睇。
章 盛