朗拿度呢位巴西球王又有豔史傳出，但今次竟然係俾人彈佢床上表現不濟！另一方面佢又咁啱公開球場上嘅成功秘訣，竟然就係「性愛」兩字。
據一位活躍於意大利影壇嘅烏克蘭籍三級女星表示，早前響一次活動認識咗朗拿度之後，兩人就開始「交往」，女星話朗拿度真係好有魅力，不過講到床上表現就好似佢射波咁──快，但係個「勁」字就始終冇提過噃！
至於朗拿度成日咁多豔史傳出嘅原因，睇嚟同佢響呢方面需索好大有關，聽吓佢接受西班牙電視台訪問時點講：「每次比賽前我都要先享受性愛，呢個就係我在場上成功嘅因素。」朗拿度你咁鬼濫，一時又傳同呢個，一時又傳同嗰個，「愛滋病」呢三個字唔可以「詐唔知」㗎！
又難怪羅馬擁躉會咁嬲，星期日輸埋畀升班馬摩德納之後已經三連敗，翌日操練就有激動球迷響球員離開練習場時向佢哋抗議，其中薛比拿、哥迪奧拿等更成為矛頭，佢哋架車都唔知俾人踢咗幾多腳至走得甩，不過「王子」托迪就冇事噃，唔通靚仔真係有着數？
我求大俠睇咗富咸對車路士場直播後，就發覺個球場真係好細，而富咸領隊泰簡拿刻意用幾條「大杉」頂住個後防，搞到呢場波車路士地面攻勢唔夠位發揮，高空攻勢又唔夠人爭，完全無晒計！重有呢個球場係同乙組隊昆士柏流浪共用，相信唔使幾耐就開始變「薯仔田」，睇嚟今季要作客富咸嘅球隊都幾頭痛。
皇馬大班球星坐埋一條船，但係就心態各異。目前響球會前途唔太明朗嘅前鋒摩連迪斯，就暗示希望出年一月轉會市場重開時，離隊去搵自己事業嘅另一個高峯。相比起同樣被球會投閒置散，最近重講明希望留響皇馬直到退休嘅麥馬拿文，摩連迪斯嘅態度就非常進取，抵讚。
F1嘅麥拿侖車手古達噚日話好羨慕德國「車神」舒密加喺車壇取得嘅顯赫成就，如果換咗喺自己，早就「收山」唔玩，用多啲時間同妻兒享家庭樂咁話。聽落好似好合理，但呢番說話出自一直認為舒密加阻住自己「發圍」嘅古達口中，我求大俠總覺得佢係別有用心，陣葡萄酸味隔籬街都聞到啦。