美股持續下滑，港股噚日跌117點，收9197。地產股繼續成為拋售對象，尤其是當市場知道標普下午將舉行記者會，當時傳出標普會降地產股評級，即時引起一輪拋售，新地（016）一度跌至42.80元，跌幅達2.3%，其後知道只是虛驚一場，地產股之跌幅才略為收窄。
不過，大家唔好開心住，噚日大戶已開始沽售銀行股，滙豐（005）成為主力沽空對象，全日沽空金額為5.83億元，滙豐佔64.2%，股價下跌2％，收報83元。中銀香港（2388）更跌破8元關口，收報7.85元。銀行股受壓，恒指可能9000關不保。
至於地產股，由於連日來跌幅已經相當大，吸引到部份投機者趁低吸納博反彈，所以要特別留意明日公布業績嘅新地。
歐亞農業（932）主席楊斌突然走咗去北韓，做了當地一個特區的行政首長，從此與阿董平起平坐。不過唔少芬佬搖晒頭，話楊斌本身有大把業務要處理，因乜事要失驚無神走去北韓搞經濟，咁佢盤生意重做唔做呢？據聞歐亞管理層想等楊主席做北韓特首之消息公布後，才申請股份復牌，可以穩定復牌後股價表現。不過，芬佬仍然滿腦子問題解不開，好難會對歐亞回復信心，管理層如意算盤相信打唔響。
星虹控股（397）噚日除權，股價即大升36.4%，收報1.5仙。該公司早前宣布20合1，然後大比例1供8，每股供1仙。Cookie話，幕後人士為吸引股民供股，將繼續托高股價直至接納供股截止日期屆滿。以現價1.5仙計，相信好難吸引人供股。
阿虎