大俠喺螢幕上成日做啲好正義嘅角色，但佢私底下嘅為人就完全唔同。當年佢同儍婆拍時裝劇，有場戲講儍婆着住條裙，唔小心跌親，大俠就要孭起佢。喺拍攝之前，大家試戲都冇乜嘢嘅，點知導演一嗌開機就出事喇。
大俠趁住孭起儍婆嗰陣時，隻手竟然揩咗落儍婆下身嘅重要部位，當時儍婆即刻嬲到火遮眼，但佢知道個鏡頭對住大俠正面，部機根本影唔到佢對手，如果儍婆發爛渣，導演搞完一輪之後，分分鐘要再拍過，到時咪重蝕底，所以儍婆就死忍拍埋嗰場戲。儍婆一拍完即刻發難，但大俠竟然扮唔知，真係厚臉皮到冇人有。最後導演梗係息事寧人，拉埋儍婆喺一邊安撫佢，但儍婆經過嗰次之後，到𠵱家都好鬼憎大俠。
余文樂同麥浚龍成為環球孖寶，四處殺敵，早前重圍攻MusicNation新人蕭正楠，搞到滿城風雨，蕭正楠勢孤力弱，佢公司就搵咗個新人阿Kenn出嚟對撼孖寶。余文樂噚日接受電台訪問，就叫記者唔好再講，又唔好再問，重做手勢投晒降咁話：「救命呀！畀吓面，問其他嘢啦！」
黎姿、吳啟華同佘詩曼上個星期去咗成都出席樓盤宣傳活動。佢哋三個以前合作拍攝嘅無綫劇集《倚天屠龍記》，𠵱家喺內地播緊，樓盤老闆娘做咗黎姿嘅fans，咁啱老闆娘又識得佢個契爺「富豪風水師」陳伯，所以就搵咗佢哋做嘉賓。
其間適逢係黎姿嘅舊曆生日，契爺同佢大事慶祝之餘，重送咗一封大利是畀佢做賀禮。
葉蒨文復出之後，都要用一段時間適應樂壇嘅新環境，好似最近紅透半邊天嘅Twins，相信都唔會有人唔認得佢哋，點知葉蒨文早前就認錯佢哋兩個，重當場叫錯名，將阿Sa（蔡卓妍）叫錯咗做阿嬌。而葉蒨文噚日接受商台訪問時，重自爆喺一個頒獎禮裏面，應該輸畀王菲，但結果個獎頒咗畀佢，佢話自己情願唔要。
梁詠琪（GiGi）同杜德偉下星期一將會去上海領取Levi's牛仔褲主辦嘅「最酷牛仔褲偶像大獎」。呢個活動過往兩年都喺香港舉行，郭富城更攞過兩次呢個獎㖭，但今年就由杜德偉得獎。屆時大會會喺會場展示一條九十呎高，約有八層樓高嘅「全世界最大牛仔褲」。GiGi同杜德偉重會着DIY嘅牛仔褲去攞獎，騷吓佢哋嘅設計天份。
怪相新人一出道就好多fans，佢每次出現，啲fans就發晒癲咁追車，好似天王咁架勢。早排佢出席一個活動，啲fans又係發咗癲咁圍住怪相新人架車，搞到記者冇位企，問啲保安做乜唔攔住啲fans，其中一個保安細細聲同記者講：「上頭落咗order，佢啲fans唔攔得㗎！」
富豪個老婆其實好本事，聽講富豪有今時今日，全靠佢呢個老婆同佢打江山。對於老公搭上女星，老婆本來重可以隻眼開隻眼閉，最緊要老公識得返屋企啫，但係個女星好高調咁多多嘢講，真係好鬼乞人憎。其實女星可以咁目中無人，係因為知道咗富豪同老婆本身冇正式嘅名份，件事發展落去係點，就要睇吓富豪係咪念舊啦！