潮流興mixandmatch，中大生物系由噚日起一連四日，喺中大本部邵逸夫堂搞咗個好特別嘅植物畫畫展，作品除咗有講求客觀數據嘅科學元素，又有富主觀嘅藝術成份，個展覽叫「植物科學中的藝術」。
展出嘅作品超過五十幅，負責搞展覽嘅生物系教授畢培曦話，畫呢類植物畫，生物學家事先要採集新鮮標本，然後巨細無遺將植物嘅特徵話畀畫家知，再由畫家以精細筆觸，畫出所繪植物嘅外貌、果實、結構等，作品重真實、細緻過解剖圖片呀！
喺中大講植物，點少得本身係植物學專家嘅中大榮譽院士胡秀英！年屆九十四歲高齡，仍孜孜不倦研究植物嘅胡教授話，當年佢出世後，患上可致命嘅「臍風」，唔知胡爸爸搵咗啲乜草藥畀佢食，先至唔使步三個兄姊後塵，因呢個病而夭折。佢大個後研究植物，就係想搵出當年食過乜嘢神奇草藥，但後來日寇侵華，佢被迫離開江蘇徐州老家，以致失去研究機會，至今仍搵唔到答案！
（圖）中大校長金耀基（左）及植物學家胡秀英教授（右），出席「植物科學中的藝術」展。
傳真︰2623-9278
電郵︰