上海置業（1207）因為芬佬要錢唔要貨，出現洗倉慘況，股價由1元樓上跌落嚟，噚日平收66仙，幾乎還原基本步，回到未升之前嘅水位。
經紀陳話，好彩上海置業趁高位時兩次集資，抽水幾億銀，財政仍穩健。
隻股基本因素雖然無變，但有啲人口風就出現大轉變。早前上海置業備受外資行分析員強力推介，重讚到隻股天上有地下無，但最近竟然有個別分析員轉口風。
究其原因，可能係因為舊年民企股當旺，分析員唔推薦一兩隻民企股就交唔到功課，但今年民企接二連三出現負面消息，部份分析員為求明哲保身，所以轉軚。
不過，亦有陰謀論者話，可能有分析員冇咗個客，唔抵得故意唱衰。
無論點都好，上海置業跌勢已成，好彩公司有錢，久唔久出嚟回購股份，可能佢哋都覺得現價便宜，此外亦可對小股東有所交代。
慕容小初