唔經唔覺，港股又連跌5日，投資者對跌市已經麻木，唔少人等待最後一跌的恐慌性拋售來臨，相信恒指短期反彈後，跟住大插一轉，就會到底。
恒指噚日最低見9141，收市報9197，跌117點，成交47億元。藍籌股沽售壓力仍大，大戶有60億元官股做「後盾」，放心沽空，大市短期即使出現反彈，無疑亦係畀大戶再趁高位沽空而已。
9月底之前，大市受制於期指結算，因為淡友已控制大局；10月初，等60億元官股去貨；之後又輪到中國電信同渣打銀行抽水，估計成70億元。所以，大市要真好，起碼都要10月中之後，捱咗咁耐，唔爭在捱埋呢一頭半個月。
大市雖然短期冇大作為，但只限於藍籌，個別二三線股仍有資金流入，就以呢兩日為例，每日上升股都有百多隻，個別選作中長線投資，贏面亦大。
佑威國際（627）又逆市而升，收36仙，升1仙，成交1350萬股，沽壓不算大，買家收集得亦好有耐性，就看其呢一輪嘅表現，筆者相信佢會係一隻可食大茶飯嘅對象。
佑威推廣其納米處理技術，剛與英發國際（439）簽訂合作意向書，研發納米處理的紙張產品，包括相簿、禮品及文具，並於本月下旬在德國舉行的紙品展會上，展示Nanomax的一系列環保紙品，預期市場會有良好反應。
佑威已將納米處理技術應用於紡織品及成衣上，並成功將技術應用在其他商業產品上，包括紙張、玻璃、瓷磚、油漆、乳膠漆及木料等，集團現正尋求更多策略性合作夥伴及納米技術分銷商，開拓盈利新來源。
佑威股價在年中由高位大幅回落，近月已止跌回升。走勢方面，9月開始形成小雙底，噚日已衝破50日線（34.5仙），若再破頸線36.5仙阻力，短期量度上升目標為43.5仙。
周線圖方面，佑威由7月中開始，形成大型雙底，底部23.6仙，頸線41.5仙，由於圖表已出現入市訊號，預計上升到40仙至43仙的頸線水平，整固後再上，中期升浪確認，目標指向60仙。
郭兆誠