美股周一晚繼續插水，納指大跌3%，杜指亦跌1.4%，收7872。杜指距911事件低位7532尚有340點，今個禮拜到位亦唔出奇。
恒指噚日跟隨美股下跌，早市低見9141，其後雖有反彈，但最後無法守在9200之上收市，收9197，跌117點。恒指距911事件後低位8894，相差303點，有機會搶先在杜指之前，跌穿911事件低位。
事實上，港美股市技術雖然超賣，但技術指標仍全部偏弱，因此無論從技術因素或基本分析，短期都應該未見底，但就會隨時出現技術反彈，不過反彈幅度有限，杜指會止於8200，恒指則受制於9600。噚晚美國聯儲局議息，市場普遍相信息口唔會變，所以冇人諗住炒減息。
大笨象滙豐（005）噚日終見腳軟，以裂口跌穿84元頸線，低見82.50元，最後收83元，跌1.75元。若滙豐不能迅速重返84元之上企穩，短期將下試78元，短炒滙豐Put輪其實仍有值博率，其中以9366數據較佳，不過趙飛雲近日手風欠順，所以都係等港股完成試底，到時反手做好友。
深圳控股（604）前日公布業績中期盈利只升0.51%（不計特殊項目則增144%），並非傳聞中咁靚，隻股噚日自然有沽壓，趙飛雲早市喺1.10元沽出計數。雖然隻股質素唔差，但短線技術已轉壞，暫時不再憧憬。
趙飛雲