九月十四日夜，馬主L名下馬匹出賽，適逢大雨傾盆，跑到臨尾兩三場，更加雷電交加，馬主L唔怕濕身，最驚閃電，唔敢走落沙圈旁邊之避雨所，佢重以為賽事會取消㖭。佢隻馬雖然識跑爛地，但此晚跑得好差，遠遠墮後。馬主L輸咗例飛錢，周圍去行吓，由地下行到返馬主廂房，據佢講：「氣氛相當冷清。」入場人數就少晒，投注額雖然下跌，但似乎比例上，跌得比較冇咁多。
呢日與馬主L食飯，碰到鬼佬S、鬼佬R唔識，但識得好多同聲同氣嘅同胞，佢話暑假期間，一位相識搵到夠，覺得在香港已經搵夠玩夠，有啲悶，於是衣錦榮歸，返咗鄉下。呢幾年經濟不景，呢位美國佬做乜生意會搵到咁多錢呀？鬼佬S話：「呢，佢喺香港做事，獨沽一味，係用電腦程式賭馬，先計算每場出賽馬匹嘅贏馬機率（probability），再計算當場賠率與機率嘅比例，得出一個回報比率，回報率愈高者，愈值得投注。講起嚟似乎幾簡單，其實我完全唔明白佢點樣操控啲數據。無論點都好啦，佢贏多過輸，有一班人跟佢賭，加埋啲賭注好大，呢位仁兄贏咗好多錢。𠵱家佢走咗唔再玩，馬場投注下跌，唔知同佢離港，有冇關係？」
呢啲事我哋唔識，唔敢亂咁猜測，只可惜鬼佬R從來唔賭馬，亦冇問佢嗰位同胞攞貼士，益唔到我哋㖭。