標榜豪宅大戶風範嘅九龍塘陶源，周六日舉辦「私家陶源遊」開放日。睇樓人士千祈唔好期望有嘉年華會或者紅歌星獻唱之類活動。發展商永泰亞洲，當日會派專人陪同準買家一齊睇樓。聲稱每個客都有兩個鐘頭，慢慢參觀樓盤各部份。
雖然唔會有免費炸雞同漢堡包派，但臨走前會奉上參茶一杯。
噚日嘅記者團雖無參茶飲，不過就飲咗由永泰業務總監李簡鳳玲親手煲嘅竹蔗茅根水。李太話，每次見記者會茶敍，都係飲汽水，冇乜益，所以今次專登畀個驚喜記者，啲蔗水煲咗成三粒鐘㗎。
中秋過後，秋意漸濃，喉嚨乾乾哋，飲咗杯成個潤番晒，多謝李太。
發展商一於懶理新盤混戰，主張睇樓歎參茶，擺明唔憂賣。陶源鐵價不二，頂層複式賣一萬蚊呎，高層七千蚊，平均都要五千八。
上個禮拜賣咗五個，樓價五百九萬至六百二萬。計埋年初首推時沽二十個，總共賣咗二十五個，佔總數約三成。
有啲行業不知不覺變得成行成市。美聯鄒永堅話，觀塘過去兩個月，有三宗汽車美容公司租地廠，例如觀塘道志聯工廠大廈三千方呎地廠，月租三萬三；大業街安昌工廈地廠逾三千五呎，租近四萬六；鴻圖道發利工廈，就重大，有成一萬四百呎，租近八萬四。
鄒生重話，由於區內同類型地廠放租唔多，所以租客惟有上門主動接觸業主洽租，相信遲吓會繼續有呢啲租務成交。第日大家想攞部車去做美容，就知去邊嘞。
大埔康樂園啱啱成咗間非常罕有嘅董事屋。物業前身為果園，原業主係園主。當年賣地畀加拿大發展時，要求發展商起間屋畀佢住，住到𠵱家賣出，淨袋三千萬。
中原周文豪話，全康樂園只得三間董事屋，呢間係第二大，近五千二方呎，花園一萬呎，是次由印尼財團買入自用，每呎近五千七蚊。
市民消費意欲疲弱，為加強市場佔有率，地鐵物業管理公司出錢又出力，開設訓練班，培訓商場租戶員工，提升服務質素。
地鐵關仕明話，商場呈兩極化，只有不斷提升商場質素，才能在競爭激烈的環境中生存。4、5月開始出動神秘顧客，向每個商戶進行服務評估，初步約有一成服務有待改善。另外又舉行咗十三個訓練班，已有七百位商戶員工參加。
除此之外，佢哋重跟內地旅行社，搞黃金假期旅行團，只要旅客剪下內地指定報章印花禮券，就可以嚟地鐵旗下商場當五十蚊使。
花咁多心思，難怪地鐵今年上半年租金收入增加近一成三。
廖創興企業沙田九肚山皓朗山莊，再搞活動促銷。今次唔送禮品，改與新城財經台合作，喺現樓搞「富貴人至好友派對」祝捷儀式。「富貴人至」係龐愛蘭（圖三）主持嘅電台節目。今次移師皓朗山莊，請來商界名人出席，等佢哋可以順便睇樓，又可以令樓盤知名度大增，一舉兩得。
皓朗山莊有4座獨立屋及18間排屋，2980至3880方呎，7月開售，至今賣出17伙，套現2.7億元。
屯門愛琴海岸「重賞之下未見有勇夫」。雖然賣得差，新地仍然守諾，選出頭三位銷售代理。
美聯中原得冠亞軍，分別有百五萬及一百萬獎金。鴻運賣出單位逾半百，得第三，獲獎五十萬。聽講今次利嘉閣只係輸個馬鼻，而港置一早就放棄。
壽臣山道6號榛園8號屋，買家證實為上市公司鴻興印刷執行董事任浩明。購入價2268萬元，洋房3195方呎，每呎7099元。
另外，蘭西早前提到，顏福偉買入渣甸山嘉雲臺千九方呎高層。但係顏生話，佢冇買入呢個單位，又畀好多朋友問，非常困擾。蘭西對引起顏生的不便，謹此致歉，講聲對唔住。
蘭西
電郵地址：