坐在意大利餐廳，打開菜牌，沙律、意大利麵、薄餅、主菜、甜品，菜款總是似曾相識，毫無新意？這間坐落奧海城，環境優雅的意大利餐廳，除了一般傳統選擇外，每隔一陣子，大廚便會想出一些新菜式饗客。秋意綿綿，大廚又有新搞作，他將不同元素如禽畜、海鮮，以全新煮法炮製，不但美味可口，而且造型精美，吃起來便更加賞心悅目。
記者：黃婉冰 攝影：伍慶泉
ImageGirl：Kelly
秋日意菜
意式鴨卷沙律$68
石斑釀蝦配紅花汁$138
芝士焗牛仔扒$198
薯絲牛柳配砵酒汁$128
＊意大利雜餅甜品68
芒果汁意大利粉$108（套餐）
意大利番茄汁焗牛仔骨$128（套餐）
＊推介菜式
是日例Talk
香料番紅花Saffron原產於南歐，目前主要產區則有西班牙、希臘、法國等地，而西班牙出產的品質最佳。一般會取番紅花的雌蕊作香料用，若要取一公克的番紅花，便要從150株花朵中摘下，皆因取來不易，所以更顯矜貴。而以番紅花作香料入饌，通常並非用作加強香味，而是要取其金黃色，作調色功能。
向來薯仔都只被用作配菜或伴碟，今次有幸成為主角之一伴着美國安格斯牛柳出場，牛柳只用黑椒和鹽作調味，純以牛柳本身的鮮味搭夠，外層纏滿切得幼細的薯絲，慢火煎至外層脆，內裏剛熟，牛柳有薯絲包住，肉汁不會流失，肉味更濃，用砵酒燒肉汁加乾葱煮汁，份量適中，為牛柳加上點點惹味。
試味報告：薯絲煎得脆卜卜，牛柳香脆軟熟腍滑，先脆後滑，薯味與肉味同樣香濃，比普通煎牛柳多一份惹味，不再單調。
意大利人食鴨要燒至七成熟先為之Good，大廚用意式香草將成隻鴨醃一醃，再燒至七成熟，鴨胸肉切絲連同蘆笋雜菜用中式麻醬吊味再以煎蛋皮捲起，食到碟底還有拌了意大利油醋汁的海蜇，意式風味夾雜中式材料，由賣相到製法與傳統沙律截然不同。
試味報告：鴨卷沙律顯然比傳統凱撒沙律豐富，鴨肉煙韌濃郁，雜菜清甜夾雜着蛋香、麻醬香，味道複雜，海蜇有油醋汁的酸香，爽脆開胃。
魚柳並非普通的朧脷柳，是新鮮剝皮拆骨的石斑肉，在魚肉上放上菠菜，再塗滿一層厚厚的鮮蝦慕絲，卷起蒸熟，蝦慕絲以鮮蝦肉、忌廉、雞蛋、香草用人手打成忌廉狀，所以質感比蝦膠軟滑，蝦味香濃，用番紅花做法式紅花汁，取其色澤，加上脆口三文魚子為清甜的海鮮帶來多一重口感。
試味報告：同一時間可以食到魚鮮與香濃蝦味，蝦慕絲比蝦膠軟滑，口感較特別，不蘸汁食同樣夠味，配搭清新得來不覺寡口。
牛仔扒連骨上陣，最大的特色是在肉與芝士中間的牛油汁，將香草和雞蛋連同牛油打勻，雪硬後切成一條條，然後用意大利巴馬火腿包着，放在輕輕煎過的牛仔扒上，鋪上芝士一焗，食時用刀一切，溶化的芝士與牛油汁滲入牛仔肉，是較少見的傳統食法，食時可借助旁邊的沙律菜消消膩。
試味報告：牛仔肉肉味始終不及牛柳般濃，但勝在嫩滑，香草牛油入口有種油潤口感，加上味重的芝士，帶有濃厚西方特色。
食甜品都有「序」?若然似呢款甜品拼盤咁味道有濃有淡，當然由淡開始順序落，軟芝士千層酥，層層酥皮夾着Mascarpone淡芝士、白酒提子啫喱、伴以杏仁薄脆的綠茶雪糕、最後到全碟至濃味的自製Expresso咖啡蛋糕，每款都由甜品師傅自製，一碟有齊不同味道與口感，各有特色，絕對是貪心鬼的最佳選擇。
試味報告：一碟有齊清新香濃脆口軟滑啫喱充滿白酒清香，提子肉的甜味跟酒味匹配，千層酥跟拿破崙相似，軟芝士加入橙皮、檸檬汁後，芝士味清香軟滑，蛋糕咖啡味濃郁重口感喜愛咖啡的人必定一吃愛上。
店名：ZZItalianRestaurant&Bar
電話：27404708
地址：西九龍海庭道18號奧海城二期地下41-42號舖
座位：96個
付款方法：現金及信用卡（Visa,Master,AE）
營業時間：星期一至四上午11時半至下午3時，下午5時半至晚上11時，星期五至日及公眾假期上午11時半至晚上11時。
備註：以上菜式只限晚餐時段供應