恒指由挫109點變微跌13點終場，藍籌股中最威中信泰富（267），由跌20仙變升45仙收市。
近排，傳統紅色領導股如中信、華創（291）同上實（363），波幅較大，跌完之後往往好易彈番上去，不過好快又落番去，低價有維持秩序隊伍入市，高價又有回吐壓力。
中信領風騷，帶動中信Call輪上榜。10大升幅輪中，有6件係中信Call輪（計埋冇成交嘅按盤價）。交投最多嘅係9037，收29仙，升5仙，幅度21%，咁嘅奄奄市況中，9037升幅好難得。
中信4個禮拜前派半年成績表，盤數靚，芬佬昅住，有平貨就會落手。中信Call輪近日彈升，高價追落去制唔過，可以等正股回番啲先至考慮，實行低買高賣，數據最靚唔係9037，但交投最多係佢，短炒始終要呢件做主角，睇住做嘢，25仙以下買入，挨近30仙出貨離場。
和黃（013）最低跌1.30元，收市跌30仙，暫時有反彈機會，吼隻和黃Call輪9518短炒，明年2月到期，現價36.5仙，溢價14%，槓桿率12.8倍。短炒算嘞，因住正股彈完之後再落過。同時，注碼要細，氹仔一樣浸親人。
章 盛