噚日沙龍網球賽開鑼，大會特別搞咗個醒獅儀式，重邀請費里路、慕耶同哥里查幫手點睛。之後呢三位西班牙球手重大方接受訪問，但係傳媒只顧同慕耶與哥里查做訪問，反而冇人理世界排名第七嘅費里路，令佢非常無癮。
睇網球又點可以冇啤酒，雖然噚日天氣唔係算熱，但啤酒贊助商用一班衣着性感嘅女郎「滿場飛」推銷啤酒，就算每杯賣二十五蚊咁貴，反應依然理想，醉翁之意……。
可能沙龍網球賽首日賽事戲碼唔係咁強，一場單打同兩場雙打都冇乜球星壓陣，唔知係咪呢個原因，噚日維園嘅入場觀眾只得三成左右。希望今日各位種籽球手悉數上陣，加埋「培哥」亮相，入座率會有所回升。