李嘉誠與胡應湘早前就港珠澳大橋爭拗，哥頓胡曾說過誠哥十幾年前曾支持興建伶仃洋大橋，但今日已經轉軚，八方趁昨日潮屬各界國慶酒會，當面問一問誠哥。
誠哥嘅回應同霍大班一樣：「冇咁嘅事，我哋第一次已經拒絕。」至於是否與「少壯派」當道有關，佢就話：「完全冇咁嘅事……我正式講只有四個字，第一係遺憾，第二就係可惜。」對於退休傳言，誠哥話：「亂講，香港愈來愈多謠言，對你哋傳媒造成很大損害。根本一句都冇講過。」
另一邊廂，哥頓出席工程師學會講座，亦唔想再提誠哥，話唔想嗌交。佢話建橋資金不成問題，佢搵過三間銀行，對方都話有興趣協助融資。哥頓話如果誠哥有興趣投資，佢都歡迎，「由長實一間做晒都無所謂」。
噚晚個酒會，李嘉誠一到場就被記者追問，誠哥不愧係有商人本色，同記者講條件：「係咪我講一句，咁就走得？」答咗一句真係封口，不過記者不罷休。寸步難行嘅誠哥，忽然彎低腰，執起一個錄音機，大叫「邊位㗎？」有個記者高聲認領，誠哥講笑話：「我幫你，你要幫我開路！」
﹙圖﹚李嘉誠喺潮屬國慶酒會上俾記者重重包圍。
傳真︰2623-9278
電郵︰