𠵱家成街係貨，市民可慢慢選擇，發展商同代理推銷一手樓時，送少啲優惠買家都會蟬過別枝，估唔到此風氣蔓延至拍賣場，卓先地產率先提供優惠畀顧客。
卓先將會喺下周日（29號）舉行拍賣會，今次總共推出31項銀主貨，主要喺港島區，兼係第一次推出拍賣，好似鰂魚涌太古城海景花園青松閣、北角樂嘉中心同薄扶林學士臺單位等。當中除3個舖位同2個車位之外，全部都係住宅單位。
卓先方面話，到時投到物業嘅買家，有啲交易費用可以獲得豁免。咁重唔止，卓先已經喺九龍香格里拉酒店訂咗地方，在10月1日國慶日當晚，免費招待呢批買家睇煙花，等佢哋唔使迫。
至於點解要揀禮拜日舉行拍賣，聽講話係就啲有興趣買家，等佢哋唔使請假。
代理咁做都係向銀行顯示誠意，證明佢哋好盡力，打好啲關係。咁樣落去以後每逢過時過節，拍賣行使唔使搞搞新意思，好似發展商咁大送優惠呢？
工商物業近期以舖位較旺，有唔少筍盤成交，回報有啲重有成一分㖭，但係點解咁正業主都肯賣呢？中原陳雁樓話有啲係業主想換馬，但好多都係被迫賣嘅，好似公司手緊或者為銀主追數。
陳生又提到𠵱家寫字樓市道好差，靠做租務為主，比例已經接近九成，好彩都可為到皮。佢老細施永青就話，寫字樓九成做租都生存到，但住宅就唔可以嘞。因為好似啲細單位，月租四千蚊，好彩收到兩邊夾埋一個月佣都係四千，但一個唔覺意就隨時得番一半，而且要跟進嘅嘢又唔少得，真係做埋都唔夠蝕。
工廈市道呆滯，不少發展商原想將工廈轉型成數據中心，準備吸引科網公司承租，最後都係無做，大家都唔知點解，答案𠵱家揭曉。
規劃署早前做咗個有關資訊科技對規劃影響嘅調查，發覺本地資訊科技公司規模唔大，一般唔超過20人，主要承接大公司旗下嘅科網設計同管理等外判工序，為遷就班客及公司嘅門面，寧願租寫字樓而唔揀廠廈，就算廠廈租金平好多都唔諗。
調查訪問咗50間大公司，地產發展商就有合和、怡和、嘉里、信和、新地同太古地產，佢哋加埋有唔少廠廈樓面，夠晒代表性啦。咁𠵱家嘅問題係啲廠廈點處置好呢？
青山公路新盤角力戰白熱化，壓軸大盤深井碧堤半島甫登場，即舉行大型嘉年華會「拉斯維加斯之夜」。地產商重準備二十幾萬本樓盤資料小冊子「碧堤半島護照」（圖三），派畀青山公路、荃灣、元朗及葵涌等地區居民。
九倉高層話，物業以度假做賣點，因樓盤名嚟自美國拉斯維加斯著名酒店，所以特意將小冊子整到好似一本護照，等參觀人士有攞護照出國嘅感覺。小冊子設計精美，最後一頁更仿效真護照印有編號，當然重有物業地址、查詢熱線、售樓處與示範單位開放時間等資料，攞住佢去睇示範單位方便好多。不過小心唔好同本真護照搞錯，唔係出境先知就笑死街坊囉。
近嚟開售嘅樓盤，有好特別嘅現象，除咗代理行爭住開記者招待會之外，重好積極咁送禮，且愈送愈重手。蘭西問過啲代理，佢哋話因發展商既然畀佣代理賺，「羊毛出在羊身上」，於是將原本送畀買家嘅嘢，改由代理行出。
問題就嚟嘞，代理行做開個頭，個個發展商嘅盤好自然都會要求代理送呢樣送嗰樣，而且又要唔少過其他樓盤，佢哋惟有頂硬上不斷加碼。有經紀話，最後可能搞到得個做字，冇錢賺。
蘭西
電郵地址：