有個天王級歌手，平時唔多緋聞，但原來間中都會偷食，好似佢之前喺台灣就曾經同一個天后級歌手有發生一夜情，好多知情者都好奇怪，唔明佢點解忽然品味變晒，因為天后級歌手點睇都唔算係靚女，真係唔知點解天王會搭得上呢個天后？
後來有個圈中人同馮仁昭講，呢位天后歌手不但止喺舞台上好奔放，喺床上一樣好狂野，所以對天王級歌手嚟講，相當有吸引力。不過佢兩個都係玩一夜情，因佢哋本身都有另一半，當然只係貪過癮啦！
天王歌手事後重同人講話同台灣天后有一手，而且重講得幾回味咁，其實天后一早已經心儀佢，但天王歌手一直冇睇佢上眼，如果唔係因為一齊喺台上合作，天后都冇機會畀天王歌手睇中，不過佢𠵱家見到天后就扮唔識人。唉！娛樂圈嘅關係真係複雜！
書生歌手去咗外國歎世界，最近再闖樂壇出唱片同開個唱，本來佢間唱片公司都好睇好佢，佢又有幾位好朋友幫手，諗住應該好順利。點知書生歌手太信老友，而佢老友又急於幫佢發圍，諗埋好多嘢就自己揸咗主意先，書生歌手聽晒個老友話，好多嘢自把自為，搞到唱片公司好頭痛，點知書生歌手重受人唆擺，周圍同人講話同公司溝通不足。書生歌手再咁落去，好易玩完。
伍詠薇及譚小環等噚日喺電視城為新劇《推理家族》試造型，伍詠薇結婚之後拍少咗電視劇，不過佢話唔係因為揀擇，佢話：「我不但止kiss戲，床上戲都會照做，今次劇中同郭晉安一對，冇得錫佢真係嘥咗。」
而譚小環噚日以一身鮮紅色旗袍造型現身，劇中佢飾演一個精神錯亂嘅女子，假裝鬼上身，小環話：「聽講新廠好猛鬼，我會帶定符、水晶同玉傍身，重會叫定啲猛男陪我收工。」
左慧琪同保采芬經過一輪爭奪後正式成為明珠大使，一直有傳佢兩個鬼妹仔不和，但估唔到佢哋會坐埋同一條船。噚日佢哋兩個喺電視城出席活動時都有傾有講，有如好姊妹一樣，唔知佢哋真正做節目時會唔會爭風呷醋呢？左慧琪話：「唔會，反而做節目就兩份驚。」
小雪噚日去旺角周生生出席港台活動，即場扮售貨員以普通話sell客，不過佢就自認普通話講得麻麻，以後會多多練習。小雪噚日好開心咁講終於攞咗車牌，而且重係考一次就搞掂，連小雪都話自己好彩，佢話：「因為我喺黑色星期五考路試，原本諗住實唔得，但最後都pass咗。而我喺未考車牌之前已經用二十八萬幾買咗架Benz，不過暫時都唔敢揸出街住。」
女藝人嫁咗個後生過自己嘅老公，早排成日傳佢哋婚姻有問題，話佢哋經常嗌交，馮仁昭知道佢兩個成日耍花槍，但係床頭打交床尾和，其實佢哋感情好好。佢老公係鬼仔性格，有時重會當街當巷錫佢老婆，重咀到啜啜聲咁，完全當其他人冇到，真係有啲頂唔順。