朗拿度重認得同埋好關心中國國腳李鐵？係真唔係呀。話說國內傳媒前日（二十二日）訪問二十六歲「牛一」嘅朗拿度，當記者提到李鐵，哨牙仔即刻話好關心呢位曾經喺世界盃碰頭嘅「老友」。可信性有幾高，留番看官判斷。
當記者問朗拿度認唔認得李鐵時，朗拿度唔止答認得，重話好關心李鐵嘅近況，希望記者代佢問候李鐵㖭。我求大俠並無貶低中國球員嘅意思，但係朗拿度同過咁多球員交手，而以李鐵性格點計都唔似踢場波就同人交心。到底係因為記者問題有引導性？抑或係朗拿度虛偽扮認得同好關心「老友」呢？
再講吖，喺世界盃中、巴之戰同朗拿度接觸最多嘅應該係負責「嘜」佢嘅李瑋峰，話唔埋哨牙仔撈亂「雙李」身份都唔定喎。
國際米蘭喺禮拜日飽食驚風散，先至憑列高巴完場前入波贏到里賈納。據講當中村俊輔為里賈納射入十二碼扳平一比一後，國米教頭古柏即刻騰晒雞，里賈納球迷重話古柏肉緊到幾乎俾煙頭「辣」親隻手㖭，好彩列高巴生性，喺吹完場雞前幫國米攞晒三分，古柏就算「辣」親都抵囉。
列斯喺前日輸咗畀布力般，爆出小冷門，原來關鍵係阿倫史密夫射失一個十二碼。當時係下半場，平時為列斯操刀嘅夏迪同埋維杜卡已經被換出，本來應該輪到保耶，但或者係阿倫史密夫最近當旺，改由佢射，結果俾費度擋出。所以話射十二碼呢家嘢，唔係話個球員當旺就實食冇黐牙㗎。
高球界盛事「萊德盃」周五先開鑼，歐洲代表蒙哥馬利已率先向美國代表嘅活士「發炮」；佢話活士埋怨出席賽事唯一一次聚餐同限定練習時間會影響自己備戰係無病呻吟，亂發牢騷。咁又係喎，「萊德盃」係隊際賽事，咁梗要講求合作同協調㗎，而聚餐只係一次咁多，活士係咪真係唔想打呀！
前排姚明雀屏中選膺NBA狀元之後，被譽為台灣籃球一哥嘅陳信安，亦正式殺入帝王隊嘅季前訓練營，重榮登帝王隊網頁㖭。陳信安體能身形喺亞洲都算係一流，不過防守同籃球意識就爭啲嘞；好在帝王二號位嘅競爭唔多，加上信安副「開麥拉」面孔夠晒殺食，喺NBA大吹海外傭兵風下，都有啲機會入隊嘅，不過講到出場就……