地產股呢排真係禍不單行，發展商割價傾銷，已令樓價下跌，近日重發生埋登革熱傳染病，真係冇運行。雖然新地（016）嘅馬灣珀麗灣個盤已經售罄，但一樣對股價有影響，投資者就算唔沽都唔敢入市撈底，新地收報43.80元，跌2.23%，成交2.2億元。其實新地算有承接力，其他一向成交薄弱嘅地產股如嘉里建設（683）重慘，大跌6.9%。
近年樓市購買力在進一步消耗後，就算政府暫停賣地兩三年，現有樓宇單位及在建單位供應量已令樓市吃不消。
大雄科技（412）併股後，股價經過一輪調整，最近輾轉回升，挑戰0.20元水平，可惜大雄股價升至0.20元水平後，有後勁不繼嘅現象，需要大股東入市增持，打番支強心針，但股價噚日仍要下跌4%，收報0.192元。
現時大市投資氣氛差極，尤其三四線股更加少人玩，就算新股上市，例如從事消防設備業務嘅萬友（8201）亦需降價20%招股，減至每股0.40元才有包銷商肯接貨。據聞，雖然萬友5億股已獲超額認購，但承配人今次純粹是畀面派對，未必會長期持貨。
市傳美林睇比亞迪（1211）會升至22元，消息一度刺激股價逆市上升至18.75元，再創上市以來新高，其後倒跌2.25%，以17.35元收市，成交達1.01億元，似乎大戶已經開始想散貨。不過Cookie報料，幕後人士曾話過要炒上20元以上，升到你唔信為止至會散貨，照計冇咁快開始散貨。但阿虎從四方八面收到嘅料顯示，根本冇咩投資者敢接火棒，任你炒到幾高都冇用。
阿 虎