經紀陳噚日打電話畀小初，話呢輪炒股真係要小心，唔好見到人哋個棚搭得靚就飛身撲上，一個唔覺意真係會中招，接咗火棒都唔知。
佢問小初有冇留意改名前叫惠揚嘅環球動力（231），近排股價由3仙起步，炒過上去4.3仙，收尾因為主席購股不成，又插返落去最低2.8仙，但近排又見異動，個棚搭到靚靚，股價就幾乎日日都升兩格。噚日環球動力又升2.86%，收3.6仙。
經紀陳話，佢有個朋友喺3仙水平收咗手貨，跟住隻股就開始陣容鼎盛，但好明顯係自己友搓波仔，隻股久唔久有一些非自動對盤上板，似係幕後人批貨出街咁款。
雖然市場對環球動力有唔少揣測，但睇嚟今次炒作與傳聞無關，可能係有人等錢使，搵人幫手炒高，沽多少貨出街套現。
另外，互聯控股（273）近排雖然升得勁，但經紀陳叫小初睇少隻，因呢系人馬慣玩私人派對，想賺佢哋錢十分難。
慕容小初