甚麼叫做迷？就是對一件事物日對夜對都不生厭，甚至可為它獻盡一切時間、精力和金錢。就像四驅車迷馬大立，自從小時候看見四驅車在水浸中濺起兩層樓高水花的威力後，便認定它是一生至愛，不但把它變成自己的事業，還為它上街遊行、開辦學校，目的是想把心頭好發揚光大，同時鼓勵年輕人只要堅持自己的理想，便會有成功的一日。
記者：曾順珍
攝影：黃子偉（部份圖片由馬大立提供）
去到馬大立元朗的住所，縱然你不知門牌，但只要在街上看到多輛四驅車簇擁着的那間屋子便是他的居所了。現時他擁有二十多輛汽車，除有四驅車外，還有古老軍車和老爺車，由於地方有限，他屋內只能泊上七架汽車，屋外也有七架，另外的十多架只能放在市區的車倉，所有車輛會定期輪流兩邊泊。
他對四驅車的鍾愛程度已不再局限於佔有了，而是要把它發揚光大，所以最近他就斥資了千多萬，在清遠開了個四驅運動練習場。
「當地政府批咗64平方公里畀我，即1,600畝地。由3號幹線至長青隧道就約有8公里，8公里×8公里嘅地，你諗吓有幾大喇，而且重係成15年期㖭。」
當然批這麼大的一塊地是要有條件的，馬大立要在兩年內投資1,200萬，還要僱用當地員工、做好綠化、防火工作，希望藉此提升那兒的經濟、名聲和人民的生活質素。
「開一間四驅車學校一直係我嘅夢想，因為好多揸四驅車嘅人都唔知車嘅性能，尤其是國內，佢哋重停留喺用四驅車鬥快嘅階段。我呢間學校就係想教人點樣提升車嘅性能同技術。」除了舉辦課程外，四驅學校還會搞比賽，藉以令國內車手學習外國技術及加強自信心。
馬大立自言要北上開辦學校其中一個原因，是香港政府令他大失所望。今年初運輸署決定由六月起禁止新車安裝防撞架，而希望明年六月新規例會擴展至所有車輛，因而令馬大立要發起四驅車大遊行。
「我最不滿係有人誓要阻止安防撞架，我啱啱收到政府嘅書面通知，話證實歐盟同澳紐現正在研究階段，所以運輸署都要再研究先可作出決定。但政府內就曾經有人話外國已經禁止安防撞架，我覺得好無理兼且會誤導市民，令佢哋以為加防撞架係犯法，所以我哋（香港四驅大聯盟）已經開會決定要正式投訴。」
「當地政府批咗64平方公里畀我，即1,600畝地。由3號幹線至長青隧道就約有8公里，8公里×8公里嘅地，你諗吓有幾大喇，而且重係成15年期㖭。」
這種鍾愛得義無反顧的地步正表現出他對四驅車的癡和迷。馬大立自小就對複雜的機械產生濃厚興趣，因為父親在上海是著名江南造船廠的工程師，所以小時候已經常到船廠看大輪船的Engine、波箱等，而且一看便是整日，旁人亦很難理解為甚麼一個只有幾歲大的小男孩，寧願犧牲跟朋友仔耍樂的時間，也要到又嘈又悶的造船廠消磨一日。
到了9歲，馬大立舉家由上海移民來港，他開始迷上當時流行的遙控模型車。「我玩嘅模型車好貴㗎，要成千幾蚊，當時我屋企環境又唔係咁好，所以惟有半工讀，蓄錢買我鍾意嘅玩具。我10歲就開始喺酒樓做打雜，只做星期六、日，由早上6點做到傍晚6點，每個禮拜都可以搵到一百蚊。之後我又喺大尾篤做過租單車，中二嗰年又同朋友合資搞有關模型嘅雜誌。」
到了14歲那年，他由玩模型車變成玩真車。
「我一定要揸車㗎，因為玩模型車又要攞一嚿好大嘅水電，而且又要去好偏僻嘅爛地玩，所以揸架車會方便啲。無錯我當時係無牌駕駛，無人教我揸㗎，我見到啲巴士佬、小巴佬咁，都係踏吓油門，再推吓波棍就行得，邊使人教㗎！（但他現在絕不鼓勵別人無牌駕駛）」不過對於自己的第一架車，卻因為年代久遠，記得不太清楚，只道應該是一架$1,500的二手電單車，跟住是一架由模型店朋友送的鈴木「八百仔」。
當馬大立駕駛四驅車「八百仔」後，發現原來四驅車並不是想像中的高性能，於是便着手改裝。
「我嘅改裝技術係由牛潭尾軍營中累積返嚟，因為軍營最多軍車，於是我成日都去嗰度睇車，嗰年我15歲，後來我重因為話過佢哋嘅四驅車係垃圾而認識咗嗰度一個指揮官。」就因為有指揮官的特別通融，馬大立可以自由出入軍營，用軍營的軍車零件去改裝自己的車，而且還跟軍人做了好朋友。
「我十幾歲時，朋友個個都係三十幾歲的成年人，跟我同齡的可能重掛住玩，但我就已經有目標，所以我同佢哋根本好難傾得埋。」
馬大立17歲便退出那份模型雜誌，把得來的錢在天水圍開了一間四驅專門店，專替別人改裝四驅車。可惜因為當時香港人對四驅車認識不深，所以無人問津，有見及此，他立即買入一批二手四驅車，改裝後才放在門市售賣，可讓買家立即測試汽車性能。
「後來，我走到Toyota車行毛遂自薦，提出和他們合作改裝四驅車嘅事宜，幸好佢哋肯畀機會我，於是我就幫佢哋嘅四驅車黏貼紙、加前後防撞架、加沙板、升高車身等，令到架車靚到不得了，最後佢哋架車賣幾多架我唔記得，淨係知賣到連日本都唔夠貨交。」
當然自此馬大立便在行內開始漸有名聲，還成為香港拓展四驅車業務的始祖。「我想講嘅係讀書唔代表一切，出嚟社會做事最緊要識得變通，好似我咁完成中五就決定唔再讀書，雖然當時父母好想我出國讀汽車課程，但只要你認清自己的興趣同志願，將佢好好發揮，一樣都可以成為一個成功的人。」
馬大立小檔案
年齡：33歲
職業：四驅專門店創辦人
1979年 9歲由上海移民來港
1983年 14歲擁有第一架電單車
1985年 16歲買下LandRover空降軍車
1986年 17歲天水圍開設四驅改裝店
1989年 跟豐田合作改裝四驅車
1995年 四驅專門店搬往紅磡
1999年 帶領中港台的四驅車展開「千禧之旅」，由希臘奧林匹克走到中國萬里長城
2002年 發起四驅車大遊行