大市弱勢未除，9200水平支持力暫仍經得起考驗，恒指落到9219又反彈，午後行情回升，收9314，跌13點，由於低開高收，走勢形成第二個錘頭，今天若能裂口高開且高收，則轉勢有望，否則仍需繼續尋底。
港股短期表現向淡，要轉勢，真係要靠外圍，但美股後市亦唔係太樂觀，冇外圍幫手，港股睇怕點都要試一試9000大關嘅支持。下個月，60億元官股登場，加上中國電信同渣打相繼上市，港股面對嘅壓力唔輕。
不過，市況雖然向淡，但個別股份仍有作為，噚日上升股（不計認股證）都超過160隻，噚日推介的華晨中國（1114）收1.1元，有3仙進帳，下半年業績明顯會好轉，係中線持有的穩健對象。佑威國際（627）一度高成36仙，收35仙，升1個位，可繼續持有。
比亞迪（1211）最後一衝，一度衝上18.75元，但基金大行在高位大手沽貨，股價掉頭而落，結果低收17.35元，反倒跌0.4元，走勢單日轉向，短期見頂，獲利回吐後可睇定才再上車。比亞迪已成為基金股，特性係高PE，但基金大手買賣時，股價亦會大幅波動，但只要能把握其升跌韻律，基金股不失為穩健的「出糧」對象。
亨泰（197）上市大半年，主要經辦貿易分銷，由於市場在內地，因此年度業績仍有理想增長。截至02年6月止的年度，營業額4.95億元，增長21.1%；獲利3840萬元，增長22.1%，每股盈利8.4仙，派末期息1仙。
集團主要從外地採購包裝食品、飲料及家庭消費品，向中國市場分銷，期內分別佔總營業額72%、12%及15%；另外，亦在天津設廠生產非碳酸飲料。過去一年，集團專注擴展產品範圍，爭取更多分銷權，包括全系列之三菱電池，以及新西蘭新鮮水果，後者在今年7月開始供應，市場反應理想。
中國入世，更多海外供應商欲打入市場，亨泰爭取代理合約，形勢更為有利，現年度盈利保守估計仍會有2成增長，以每股盈利9.1仙計，現價預測PE僅4倍，派息估計2仙，息率5.4厘，現水平入市，持有1年，回報料不俗。
郭兆誠