早個星期，亞Mark披露咗勞斯萊斯豪華轎車秘密抵港，令唔少行內人士感到愕然之餘，原來幾乎同一時間，寶馬車廠亦秘密運嚟全新Z4開篷Roadster；車廠處事咁積極，難怪近年會成為德國本土增長至快賺錢至多嘅車廠啦！
至於呢部寶馬新Roadster，除咗係用以入替原有嘅Z3外，重係廠方用以抗衡保時捷Boxster嘅新武器，由於Z3早前響香港有唔錯嘅業績，故廠方特意讓Z4喺香港嘅曝光時間，幾乎與法國巴黎車展同步進行，並成為Z4亞洲首展嘅地方。
雖然嚟緊呢個星期五，代理會隆而重之響尖沙嘴某大商場舉行車展，擺出左軚Z4給Fans近距離接觸，惟真正到車日期，快者都要明年3月左右；但據知Z4賣價十分吸引，早前曾提及過嘅全新2.5公升同3.0公升直6DOHC偈型號，車價僅為四十幾萬起。屆時車展重會有許志安同郭羨妮做特別嘉賓㖭，睇落又真係幾有瞄頭噃！