好多人都話問責高官冇用，八方就發現原來有啲高官後生嗰陣都相當「堅」。唔好睇環境運輸及工務局局長廖秀冬斯斯文文，就以為佢好柔弱，原來佢讀大學時係運動健將，曾經攞過推鉛球冠軍，重曳到成日走堂！
廖秀冬噚日返母校香港大學出席佢以前住過嘅學生宿舍聖約翰學院九十周年嘅紀念活動。七○至七三年喺聖約翰學院七樓七一七室住過嘅廖秀冬，一返到母校就忍唔住大爆以前讀書時嘅事，佢話中學時已經玩好多運動，所以入到大學，除咗游水之外，重玩曲棍球、入壘球隊，又跳遠，人仔細細嘅廖秀冬，參加推鉛球比賽重攞冠軍，佢笑住話，「嗰陣時我重瘦過𠵱家，𠵱家叫肥婆啦」，不過廖局長都有靜嘅一面，歌詠團同管弦樂團佢都參加過㗎。
又要讀書又玩咁多運動，時間點分配呢？廖秀冬喺學生面前好坦白咁話，好多時候都走堂，咁都唔止，佢重大爆自己成日叫個同佢差唔多咁高，又姓廖嘅中學同學扮佢去上堂㖭！
傳真︰2623-9278
電郵︰