經紀K講完許照中，與左丁山一齊走落條FCC旁嘅長樓梯，落番雲咸街，行去大馬路，經紀K講一個古仔：「我有一個長期客戶最近唔再做買賣，我為咗啲佣金，梗係追問原因啦。呢個客早年蝕過唔少，蝕完又嚟炒過，憑豐富經驗，近年得心應手，淡市都搵到可觀利潤。俾我追問之下，個客話：為仔煩惱，應付不暇，要唞一唞先。」
經紀K後來查明真相，原來人客之子今年三十二歲，九五年自美國讀完書回港，返嚟搵到份好工，九七年轉做I.T.，二○○○年趁科技股狂潮，賺咗好多錢，但唔識得鬆人，卒之好似八號仔咁，輸番晒，打回原形。自此以後冇乜心機做正職，覺得人工太少，好難搵到一千萬，竟然轉去炒外滙，希望發達。
新仔入行，例牌炒到燶，近來頻頻被call孖展，只好向老竇（經紀K位大客）伸手，老竇梗係㷫到彈起啦，自問久歷沙場，二十年前炒外滙曾經輸到暈，點估到自己個仔會瞞住自己炒滙，要自己抬錢去打救也。
經紀K嘆一聲話：「曾經有過紙上富貴，比較難回復朝八晚七，等月尾出糧嘅生活，唔少香港人重係處於心理調整狀態，未能全心工作，人客嘅仔只係其中一個例子，睇嚟我都要教吓個女炒股炒外滙要訣，免得佢第日俾人呃或者犯大錯！」