港股噚日觀望氣氛濃厚，恒指早段低見9219，其後在9240附近牛皮，猶如死水一潭。午市期指再試9209低位不破，即掉頭向上，帶動恒指反彈，最後收9314，跌幅收窄至13點，成交則縮至38.8億元。
期指本周五結算，但大戶仍未見有大動作，噚日未平倉即月合約逾48000張，淡友似仍在等消息出擊，一片山雨欲來之勢。
淡友近期已狂質電訊股及地產股，呢兩類股份已相當低殘，不少已跌破去年911事件低位，淡友要進一步壓低大市，相信要向滙豐（005）及近期逆市上升的公用股埋手。短期恒指會否追隨杜指跌破911後低位，關鍵在於滙豐能否守住頸線84元支持，滙豐噚日微升0.25元，收84.75元。
技術上，滙豐已超賣，9RSI背馳，STC快線%K升破D%線，均利好短線反彈。不過以上利好訊號其實十分薄弱，只要出現大陰燭跌破84元便化為烏有，因此滙豐現水平只宜觀望，甚至趁反彈買Put輪，撈底則未到時候。
倉內嘅深圳控股（604）昨下跌0.02元，收1.14元。執筆時仍未公布中期業績，惟有靜觀其變。股仔意科（943）昨日公布中期業績，預咗唔會靚。有小道消息話，未來幾個禮拜隻股會做番靚啲，然後有動作跟尾。不過趙飛雲覺得，喺咁嘅市況，就算真係有心都未必有用。
趙飛雲