上禮拜五美股冇事，3大指數都有啲進帳。油價微微上升，直逼上次高位。伊拉克問題拖拖拉拉，油價唔落得。到真正開火之時，油價可能嚟一次反高潮，不升反跌。但一日未開戰，局勢緊張，則油價仍會高企。
短期炒輪，可以諗吓同油價相關嘅窩輪。國泰（293）上禮拜最低10.05元，彈上11元後回落到10.65元。油價上升不利國泰，國泰個勢向下，買些少國泰Put輪，9117有一定成交，有8個禮拜至夠鐘，現價22.5仙，溢價0.9%，槓桿率4.7倍。國泰另外有隻Put輪9192，壽命較9117長1個月，槓桿率亦大啲，但溢價同成交量輸蝕畀9117。睇淡國泰，揀國泰Put輪，冇乜得揀，9117係主角。
又諗吓邊類股票可以因為油價上升而得益，當然離唔開石油股。暫時3大油股中，中石油（857）最偏低，上升空間比較大。
中石油Call輪有得諗，第一對象係9070，明年1月到期，現價35.5仙，低水0.9%，槓桿率4.6倍。第二對象係9361，明年6月到期，現價17.3仙，溢價4.5%，槓桿率9.4倍。兩隻輪都係中石油Call輪中交投比較活躍嘅。
章 盛