此日行經FCC，經紀K剛好推門出嚟，大家幾乎撞到正，閒談幾句，經紀K話呢排股市每日成交額處於吊鹽水狀態，生意難做到極，佢有幾位老友已經「起身」，轉做MD或者「量地官」，佢自己好彩重有啲多年老友支持，叫做維得住皮。喺艱難時期，少啲斤両都企唔住。
經紀K話：「我個老友許照中StephenHui就夠晒斤両，不止身高體重肚腩大，成個發達闊佬相，實在佢好有功夫，就快轉去『大華繼顯』（UOBKayHian）做阿頭，再戰江湖。」
有料之人，幾時都唔使愁。老許做《華僑日報》記者出身，後來加入新鴻基證券，喺資料室（即今日之研究部）工作，因表現出色，俾馮家彬睇中，掹佢出嚟，佢嘅工作就由RobertNg（吳鴻生）頂上，所以老許至今仍然稱呼馮家彬為師傅。
馮景禧之新鴻基證券，係本港證券界少林寺，不少名人都在此打過木人巷。今屆馬會董事會之中，有兩位跟過馮景禧，一位就係馬會主席夏佳理，一位就係馬會董事陳祖澤，相信馮先生泉下有知，亦會微笑。許照中當年在新鴻基，與不少今日名人交手交流交往，學到唔少絕藝，為他日事業打好基礎。佢嘅弟弟許漢中係港龍航空董事總經理，近日為咗內地航線經營權與國泰纏鬥，夠晒硬淨，亦好似大佬咁，夠斤両也。