早陣子，亞Mark話過日產代理會再度引入第2代全新Primera，以填補Sunny同Cefiro車系之間嘅空缺；據聞新車會於今個月底正式登場，惟比較起上一代，新Primera可謂截然兩樣，除賣相要變得前衞見High-tech感外，就連車廂鋪排亦好In，尤其係一排中置圓表設計，再襯以5.8吋嘅屏幕顯示器，以方便調校音響、冷氣等功能。再者，前後兩排高級絲絨座椅，重有單碟CD音響同恒溫冷氣，唔少得重有雙安全氣袋裝備；然而，一台2.0公升直4DOHC偈屬QR系列，以慳油環保為主，再配以CVT無段變速自動波，令新一代Primera要變得斯文，尚幸四輪16吋合金軨夠型有房跑車味道，加埋約16萬上落嘅車價，睇嚟萬事得Mazda6同豐田Camry今勻真係遇到對手喇！