成名要付出代價，呢句說話一啲都冇講錯，就好似台灣人氣組合F4咁，前日雖然係中秋佳節，不過F4嘅言承旭、周渝民、朱孝天同吳建豪，依然要繼續趕拍《流星花園II》，冇得放假唔在講，最慘係連覺都冇得瞓。
F4四子前日喺台北嘉義嘅中正大學拍攝畢業戲，由於佢哋呢大半年嚟日忙夜忙冇覺好瞓，前日又要一早六點開工，結果拍到行畢業禮嗰場戲時，佢哋四個企企吓攰到好似就嚟瞓着咁，企住嚟「釣魚」，真係好嘢，相信冇乜邊個可以做得到。
講番前日F4拍嗰場戲，製作單位為咗隆重其事，特登租咗一黑一紅嘅Toyota跑車，又請咗一百五十個臨時演員着晒畢業袍嚟拍。原來有唔少臨記都係F4嘅忠實fans，拍攝嗰日雖然係中秋節，但啲fans寧願做臨記陪F4拍戲，都唔返屋企做節，可想而知F4嘅吸引力有幾大！
香港電影市道雖然吹淡風，但身在美國發展嘅成龍，就片約不斷。馮仁昭聽聞除咗荷李活之外，就連德國都對成龍有興趣，出到成一百萬美金一日（約七百八十萬港元），搵成龍開拍新片，套戲預計工作天係十四日嘅話，成龍已經有成億袋落袋，可惜佢大哥唔多鍾意個劇本，所以將劇本退番畀對方，等劇本修改完至決定喎！
有位女歌手最近翻舊帳，話當年同男歌手拍拖嘅時候，俾一個女藝人撬牆腳。但呢個圈好多人都知，嗰位女歌手都幾白鴿眼，當年佢同男歌手拍拖，男歌手重未走紅，女歌手就嫌男歌手冇出息，所以主動飛人，但當男歌手紅咗之後，女歌手就話俾人撬牆腳，所以呢位女歌手𠵱家點樣喺人面前扮可憐，都冇乜人會同情佢。
影后唔好彩嫁咗畀個同性戀外籍老公之後，一直都好唔開心，所以佢同影帝搞埋之後，總算可以得到一啲慰藉，不過影帝唔知點解死都唔肯同個女星女友分手，搞到影后好冇癮，因為佢都有唔少追求者，但佢又偏偏對影帝情有獨鍾。其實影帝個女友都知佢兩個有嘢，但因為佢自己要出嚟搵食，經常同啲男人出雙入對，所以佢其身不正，當然唔敢話個男友，最後佢哋咪各有各玩囉！
任賢齊（小齊）之前喺台灣接受張小燕訪問時，唔覺意透露曾經愛上合作拍戲嘅對手，小齊日前去咗大馬做宣傳，即刻俾當地傳媒追問佢有關鍾意對手嘅事，不過小齊就話要做個好演員，必先要令自己投入角色，但係戲一拍完就會識得抽離個角色，小齊重話：「呢個係我對工作嘅尊重嘛。」
陳松伶（松松）早排去上海做嘢，佢嘅朋友帶佢去上海好出名嘅「皇城老媽」食四川火鍋。松松話去到見到啲奇形怪狀嘅食物，好似海馬、毛肚同豬喉管咁，真係打咗個「突」，懷疑啲嘢係咪食得，點知食落肚之後簡直食唔停口，所以話有時啲嘢真係唔可以淨係睇表面㗎！
有個選美出身嘅過氣女藝人，當年因為佢嘅年齡同身材，曾經都紅過吓，啲人重叫佢做奇女子。𠵱家佢年老色衰，冇晒市場價值，惟有喺內地登台搵番些少過活。其實奇女子一直唔想放棄香港市場，最近返嚟搵咗幾個相熟嘅記者，影咗幾輯相，不過報館啲阿頭話奇女子冇晒新聞價值，冇一份肯登，馮仁昭都戥佢慘。
女藝人通常都好鍾意花錢扮靚，劉綽琪早前去咗雲南同昆明拍攝旅遊特輯，當然唔會放過買嘢嘅機會，花咗成二千幾蚊購買民族小飾物，重搞到要問人借錢，返到嚟香港只係淨番二十蚊喺銀包度，真係千萬唔好睇小女人嘅購物慾。