大陶精密（8041）上個星期失驚無神升咗兩日，股價加埋抽高幾十個巴仙，跟住就停牌，公布喺大陸搞咗個合資項目。復牌之後股價都叫做守得住，上周五微跌唔夠1個巴仙，收16.3仙。
大陶今次呢個合資項目，話就話要注入1000萬美元，但查實只係轉讓技術同機器設備，唔使畀現款，所以應該唔會對大陶構成影響，但小初就唔明單deal有咩咁特別，之前股價點解升得咁勁？
經紀陳久唔久就同小初提吓呢隻股票，因為佢有班老友坐得相當重，成本價較現價高出好多，所以佢覺得有關人士，點都要炒高隻股套現鬆人。
大陶早前進行供股，跟住再批出一手4千萬元嘅可換股債券，其實幕後收貨已收咗唔少時間，而且搵埋大陸外援幫手，但搞咗咁耐都未見有聲氣，真係難明。
經紀陳話要留意批債券換股價係17仙，呢個價位好有玄機。
慕容小初