永泰亞洲嘅九龍塘豪宅陶源，上個禮拜透露短期攞到滿意紙再推出發售，但近日仍有成交消息傳出。樓盤頂層共有兩個複式單位，聽利嘉閣分區經理林松偉講，一名廠家出價每方呎超過八千蚊洽購，但發展商就堅持要一萬蚊呎先肯賣。𠵱家係買家嘅天下，發展商有生意都唔做，要好夠勇氣至得。
呢兩個頂層複式單位，每個面積近二千九呎，四房（連套房）及工人套房設計，樓底有成十四呎高，望鯉魚門同維港景，重喺豪宅區，有咁多優點，難怪發展商咁惜貨。陶源已經賣咗二十幾伙，剩番唔夠五十個待沽。
永泰亞洲企業拓展總監李簡鳳玲喺月中已講過，陶源頂層複式單位呎價大概要一萬蚊，而中高層都要六千到七千蚊一呎。重話陶源嘅買家較成熟，發展商唔使減價賣樓。睇嚟有興趣嘅人士應知道點做！
每逢大節日，好多公司都會互送禮物聯誼一番，蘭西嘅部門中秋節前亦收到相熟公司送來月餅或果籃，在此講聲多謝！
喺咁多公司中，信和都算大手筆，上個禮拜搵專人送來幾個果籃。唔知係咪忙中有錯，有同事一連收到幾份，有名收件人重係大家都唔識嘅，叫送嚟嘅人攞番走，佢又唔肯，同事們索性分甘同味。並代信和捐番啲畀蘋果慈善基金，在此替受惠者向信和講多句多謝！
新地蘇仲強同恒基張炳強前日以街坊裝，拖男帶女，扶老攜幼，一行七人，去探九倉黃光耀（Ricky），為佢打氣。Ricky就帶佢哋睇碧堤半島現樓頂層，張炳強重話阿媽起碼要入一張票喎。而且又抵死咁話，要用一個屯門愛琴海岸交換一個碧堤單位。唔知人哋制唔制呢？
另外，Ricky之前講過，已預留碧堤8座1個頂層單位，畀自己嚟收租或自用。聽講原來大姐Ming（林建明）都對8座頂層D單位有興趣，隨時會同Ricky做鄰居。大姐Ming老公原來係九倉高層，聽講職員買樓有2%折扣。
好多發展商賣樓都鍾意搵代理幫手造勢，有啲鍾意自己做，唔畀代理踩場，總之各師各法。但係好似香港興業嘅做法就矛盾咗啲，一方面將愉景灣海澄湖畔交畀代理做，一方面又對佢哋諸多限制，講明無客帶唔准入售樓處，唔准喺現場兜客，每間行只可派小量經紀駐場，重只可企埋一邊，閃閃縮縮好似做賊咁。
這無非都係驚班代理撬晒啲客，惟有限住佢哋，結果係點？好無癮囉，班代理被綁手綁腳，點搞都搞唔旺個場。
美聯物業做生意之餘，都不忘做善事，佢哋成立咗兩年嘅「美善會」，在中秋節前去「麥當勞叔叔之家」派月餅；早前搞嘅繪畫比賽噚日就喺九龍塘頒獎，有幾百名家長同仔女一齊出席。
美聯執行董事兼美善會主席林鳳芳對蘭西講，今次嘅繪畫比賽，收到超過千份作品，選出咗百幾份得獎作品。
據林鳳芳講，美善會每個月都會有活動，經費來自籌款、義賣物品及違規同事嘅罰款。美聯執行董事張錦成重透露，美善會呢個名，係武俠小說名家查良鏞（金庸）幫佢哋起嘅。
另外，小欖愛琴海岸嘅內購同公開銷售，美聯促成最多，攞到冠軍，獲發展商送贈一百五十萬獎金。新界區營業董事布少明就喺今晚擺二十圍祝捷，每圍價值3880蚊。
中秋節前地產商及代理齊齊大搞宣傳，百花齊放。今個禮拜市況就唔同嘞，注意力應該集中番深井碧堤半島。但唔代表其他盤冇動作，只係少啲咁解。今日就有個單幢樓盤，開放示範單位，保華地產發展嘅上環永樂街達隆名居，示範單位設喺附近永樂街148號南和行大廈3樓。照睇呢個盤買家都係街坊客居多。