三十七歲任職地盤散工的曾憲業，日前在工作期間意外飛墮電梯槽身亡，遺下妻子阿娟及一名十三歲的兒子，突如其來的噩耗，令她痛失至愛，且失去家庭經濟支柱，刻下，她還要為亡夫的殮葬費用憂愁，感到前路茫茫。
容顏憔悴的阿娟嗚咽地說：「嗰晚佢冇返屋企，第日就接到公司嘅消息話佢工業意外死咗，我根本面對唔到呢件事，晚晚都要食安眠藥先瞓得着，我哋兩仔乸嘅生活開支暫時都係靠親戚幫手。」
三十五歲的阿娟與丈夫曾憲業結婚十多年，育有一名現年十三歲、就讀中二的兒子傑仔，她婚後辭去電子廠工作，在家相夫教子，生活開支全由在工廠任職維修技工的丈夫負擔。九八年，其夫任職的公司因生意欠佳倒閉，失業多月後，九九年便轉行做地盤散工，月入約七千元，除了繳付基本的伙食費用，還要與姊弟一起供養年紀老邁的母親，經濟緊絀。
雖然一家三口要節衣縮食，然而在阿娟眼中，他們雖貧亦樂，其夫更是一位百分百的好丈夫及好爸爸。阿娟回想與丈夫一起的愉快日子時說：「佢唔食煙又唔飲酒，放工就返屋企，為咗慳啲錢，放假我哋都好少周圍去街，多數都係去探嫲嫲。」
依在母親身旁的傑仔向記者道：「好掛住爸爸，佢平日放工就陪我傾偈、打遊戲機同埋睇電視，佢知道我鍾意睇漫畫，有時就買漫畫書畀我睇。」
七十七歲白髮蒼蒼的曾母，剎那間要面對愛兒身亡的打擊，連日茶飯不思，她老淚縱橫：「佢兩歲時阿爸就死咗，好早要出嚟搵食，若果佢有書讀，就唔使咁辛苦，佢真係好孝順，成日嚟探我，有時重會畀錢我使，佢話收入少咗，所以都唔敢亂使錢，𠵱家一下子就跌死咗，剩低佢哋兩仔乸，真係好慘！」
為了兩母子日後的生活，阿娟打算向社會福利署申請綜援金。蘋果日報慈善基金了解她的經濟困境後，即時從「殮葬專戶」撥款一萬元，助其殮葬亡夫，以解燃眉之急。
捐款編號：C0692
暖流熱線
電話：29908688
傳真：23702192
電郵：
網址：