民協主席馮檢基嘅議員辦事處噚日開幕，開正喺何文田房委會總部對面，睇怕佢第日去房委會示威，攞橫額都方便好多。唔知係咪呢個原因，連房屋及規劃地政局局長孫明揚、立法會主席范徐麗泰噚日都畀面去開幕剪綵，孫公隻腳重唔覺意搶咗阿基風頭㖭。
喺台上面，孫公蹺起隻腳，八方老友點睇都唔多順眼。睇真啲，原來執得四正、着晒老西嘅孫公，着住皮鞋嘅腳竟然冇着襪！八方老友聞就聞唔到乜嘢異味，但係就奇怪唔通孫公平日返工都係着鞋唔着襪？孫公笑笑口，話自己只係放假唔着襪喎，佢重好開心掀開西裝褸，入面係一件藍色短袖恤衫，總之就係放假look啦！
不過咁，孫公着嘅老西都唔係普通嘢，係意大利名牌EmporiumViri，老婆買嘅，襯乜都咁型咁靚啦！
（圖）孫公（左）冇着襪，搶晒鏡。
傳真︰2623-9278
電郵︰