好多人話意大利波唔好睇，主要係太注重防守，同埋電視直播角度唔夠正，但係我求大俠就覺得最大問題係球員嘅態度。就睇前晚祖雲達斯贏安玻里場波，實在有太多插水博犯規，場波就猛咁停，點會好睇吖。結果我睇完半場到西甲一開波，就即刻轉台。
好似迪比亞路每次同人埋身接觸幾乎「老馮」跌低，博到犯規，計我話十次裏面至少有四次唔使吹。查實呢個現象喺意甲好普遍，尤其班大牌球星慣晒姿勢係唔係都跌。
最慘係佢哋出到去歐洲賽都係咁有性格，之但係外國球證使鬼畀面你咩？真係跌死都博唔到犯規。執法尺度唔同，應該都係意大利喺世界盃鎩羽，同埋意甲球隊近年喺歐洲賽唔掂嘅原因之一。意足總真係要做番啲嘢，咪再畀班球證寵壞班球員囉。
阿仙奴龍門施文前日對保頓又出洋相，俾好日都唔入吓波嘅費華利傳中笠死，好自然令人諗起佢喺世界盃俾朗拿甸奴笠死嘅醜態。好彩，又有差唔多半年無入波嘅簡奴喺補時射入，幫阿仙奴攞三分，令到施文唔使做失分罪人。唔怪得施老伯賽後攬實簡奴，當正佢係寶咁啦。
曼聯領隊費格遜日前批評荷蘭前鋒雲尼斯達羅太獨食，叫佢要交多啲波畀隊友。雲尼斯達羅係就係要改善吓，不過諗落又唔可以完全怪晒佢，鬼叫費爵爺之前成日用「四五一」陣式，搞到佢慣咗孤立，自己搞掂晒咩，爵爺要畀多啲時間人哋至得㗎。
愈嚟愈覺得孫繼海無得頂！前日曼城無作客輸畀韋斯咸，多得繼海兄幫手救出個必入球。雖然有啲英格蘭傳媒覺得佢重需要改善，起碼賽後由曼城官方網站搞嘅投票，有五十四個巴仙球迷選佢喺曼城該仗嘅最佳球員，比第二位嘅安歷卡多十個百分點。真係威過威士忌。
噚日阿根廷小將納賓迪安同阿諾，喺台盃雙打苦戰接近六個半小時以三比二贏咗俄羅斯「雙雄」沙芬同卡菲尼哥夫，為祖家追至一比二，但最令我求大俠感動係，呢兩對小將同球星為咗國家榮譽，可以咁認真，睇怕個啲只顧個人名利拒絕為國家效命嘅球星都應該汗顏囉。