今場係國內第一場甲組聯賽，現場吸引二千幾球迷，場面都幾熱鬧，而且佢哋都係「文明球迷」，不論主隊香雪同客軍花花打出好波，都拍爛手掌；親自北上打點一切嘅足總總幹事林俊英都話好滿意國內賽會安排，係一個好開始。
香雪制藥下一次主場要到十一月五日，面對上屆冠軍晨曦，佢地𠵱家重搵緊下場場地，據講可能安排喺廣州、惠州等，但好似今場能反勝花花，增城康威體育場可能係佢地嘅福地，咁就「唔搬好過搬」啦。
呢次跨境甲組聯賽，大會對香港傳媒認真周到，球場安排晒電腦同傳真機，睇番香港大球場同旺角場就真係「百冇」，香港足總絕對值得借鏡。