上個禮拜，忽然爆出立法會秘書處應劉慧卿議員要求研究聯繫滙率存廢，周五滙市即時風起雲湧，好彩財委會緊急扑低咗個建議，及時阻止咗班大鱷興風作浪。卿姐做咗十年民選議員，今次可謂老貓燒鬚。
卿姐噚日出席平機會活動，自然又俾記者啄住唔放，有行家提及有學者批評佢，卿姐即刻話：「我唔同意佢嘅意見！重有呀，我都唔同意有啲立法會嘅同事，佢哋好似失憶咁！」卿姐一路講，一路面都黑埋，發晒脾氣。
卿姐無解釋佢句說話嘅含意，斷估應該係鬧緊當日有份出席會議通過要求進行聯滙研究，事後又話唔係好記得支持過呢項研究嘅議員。
今個中秋節，卿姐唔係過得咁如意，不過最開心嘅可能係金管局總裁任志剛。記得去年金管局斥資四十億買國際金融中心二期做總部，被人將軍，任總要上立法會解畫。佢本來忍得好好，點知最後仍然被劉慧卿激到失態，在鏡頭前發火。卿姐今次無端搞出個聯滙風波，任總可算報晒仇。聽金管局消息講，若非財委會行動迅速，佢哋呢個周末唔使旨意有假放，更遑論悠悠閒去賞月。
傳真︰2623-9278
電郵︰