萬眾期待嘅電影《蜘蛛俠》DVD，終於鐵定10月14日正式見街，現已知道此碟會有「普通版」同「限量版禮盒裝」兩種包裝；預計售價分別為$175及$248（由於是孖碟裝所以價錢會貴啲！）。
今次「限量版禮盒裝」最特別之處，是跟碟會多送原裝美國進口限量版漫畫、珍藏手稿畫及珍藏電影菲林一格，真係有錢都未必買到。另外如果你𠵱家預訂，重會多送你一份「套裝禮物」，當中包括有DVD碟袋、襟針、明信片×4及原裝海報一張等，如果間碟舖冇畀你，一定要問佢攞番呀！
近排行開碟場，有冇發覺忽然多咗一啲經典香港電影VCD呢？事關得利影視最近翻出好多經典VCD之作。今個星期率先落場嘅有李連杰《黃飛鴻》系列，緊接下星期就有李小龍系列（例如《精武門》），再下一輪嘅經典VCD，重有發哥嘅「英雄」系列。呢堆片唔少已經絕版多時，而且每隻定價大約在十零二十蚊，好此道者真係不容錯過！
講到dts嘅試機碟，好多人都會諗起呢隻《DEMONSTRATIONDVD#4》，不過呢隻碟真係唔係太多地方有得買，最近筆者行開深水埗，又再見此碟的影蹤。當中不得不提，係碟中收錄了EAGLES的《HotelCalifornia》同埋ROYORBISON的《PrettyWoman》，好多發燒友都話，呢隻碟所收錄嘅歌曲，好多要比原裝DVD碟還要好，所以用嚟試吓部機嘅5.1聲道最一流，更重要係價錢唔貴，$98就買到真係幾抵。
記者：朱崇德