中秋係人月兩圓嘅日子，梗係要成雙成對先至夠應節。八方噚日忙裏偷閒去咗大埔超級城睇慶祝活動，感受吓過節氣氛。大會除咗請嚟新疆表演隊表演舞蹈、同埋有廣西雜技團表演高車踢碗、柔術滾杯之外，重好有心思安排咗好可愛嘅孖仔孖女，扮演唔同嘅中秋人物，好似嫦娥、后羿同兔仔，認真得意，睇到台下大人細路都笑逐顏開，乜嘢衰嘢都唔記得晒。
既然係孖生，扮相梗係要一樣先夠過癮，其中九歲孖女蔡碧璣同埋蔡碧蔓就一齊扮演嫦娥。
細妹碧蔓同八方話，今年中秋好開心，因為係佢第一次喺中秋節上台表演。點知話口未完，家姊碧璣亦都搶住答，佢都係咁覺得喎，孖生姊妹果然心靈相通。
﹙圖﹚九歲孖女蔡碧璣同蔡碧蔓(左)齊齊扮演嫦娥應節。 陳亮華攝
傳真︰2623-9278
電郵︰