汽車界潮流興SUV，來年豐田續有多款新車推售，繼今年底前廠方會推出全新LandCruiser同Prado新車外，來年主要針對北美市場嘅凌志RX300（即日版豐田Harrier），亦會有全新型號面世。新車造型來得流暢趨時之外，向以轎車格局示人嘅車廂組合亦會被保留下來；至於引擎配搭，仍會以2.4公升直4DOHC同3.0公升V6DOHC偈作主打，惟2.4公升偈都會用上直噴式D4構造，相信會因此有更慳油嘅表現㗎！再者，底盤結構亦會被全新強化改良，務求日常On-road駕駛時，會來得暢順同平穩呢！
家庭式MPV市場方興未艾，豐田Ipsum（即港版Picnic）響港、日兩地不乏車迷追捧，惟廠方正有計劃響來年5月，推出一部體積較少，介乎Spacio同Ipsum之間嘅7座位MPV；賣相有型吸引之餘，佢重有別傳統用上左右雙趟門設計，以方便乘客上落。至於引擎組合，大抵會採用1.5公升同1.8公升直4DOHC偈為骨幹，或許重會改配軚式自動波裝置，以求車廂之間有Walk-through嘅方便嘛！