昨日是一年一度的中秋佳節，梁詠琪（GiGi）與參加本報「偶像齊齊玩」活動的十位fans，及其歌迷會的會員，齊齊到老人院派月餅及玩遊戲。而晚上GiGi則會與男友鄭伊健一邊賞月，一邊燒嘢食，實行人月兩團圓。
由《蘋果日報》主辦的「偶像齊齊玩」活動，除一直製造機會讓fans與偶像近距離接觸外，亦不忘行善積德。昨日中秋佳節，本報特別請來梁詠琪（GiGi）與fans齊齊做義工，到青衣長安邨一所老人院與眾長者歡度中秋。
問到GiGi今年中秋節會否與男友鄭伊健一起共度？GiGi甜絲絲地說：「我今晚會約埋啲朋友嚟我屋企燒嘢食，咁佢（伊健）都會嚟，我哋屋企咁近。」
而今次除本報選出的十位fans參與活動外，GiGi的歌迷會亦派出十多名義工到場協助，其中更包括仁濟總理兼GiGi超級fans梁仲安（John），他昨日並充當攝影師，認真落力。
其實由本報選出的十位fans，初見歌迷會的十多位義工到場時，因怕親近GiGi的機會被分薄，都顯得有點妒忌，但後來眾人一起參與派月餅工作時，便慢慢開始熟絡起來，當中有不少更成為朋友，互換電話號碼及電郵地址等，全靠偶像作凝聚。
昨日GiGi抵達老人院與在座的六十多位老人閒聊一會後，便派發禮物及帶領公公婆婆玩遊戲，其間更不時向大家說：「中秋節快樂！」最後又高唱《月亮代表我的心》及玩猜燈謎遊戲，將現場的氣氛推至最高。而由GiGi擔任代言人的FanclHouse及Olympus都相當大手筆，送出多種禮品給眾長者，大家都盡興而歸。
GiGi覺得今次活動十分有意思，她說：「好多謝咁多位歌迷，今次亦都係我第一次同歌迷一齊做探訪活動，可以帶佢哋做啲咁有義意嘅事，好開心。」昨日所見，GiGi十分懂得搞氣氛。
而今次參加「偶像齊齊玩」的fans，昨日都異口同聲表示GiGi較以前消瘦不少，令他們有點心痛。其中一位fansPatrick說：「有其他歌迷出席今次活動，我覺得好似唔係咁好，但係今次可以做義工，又可以識朋友，都好開心。不過見到GiGi瘦咗好多，希望佢快啲肥番啦！」
而將於下周五返回英國留學的Dave則說：「今次都好開心，我三、四年前喺英國見過GiGi一次，當時就開始鍾意佢，我覺得佢好高呀。」
採訪：汪正文、羅慧敏 攝影：陳志嵐